प्रधानमन्त्री शाह सवार गाडी समाचार तयार पार्दासम्म धादिङ पुगेको थियो। उनी शुक्रबार नै पोखरा पुग्ने कार्यक्रम रहेको छ। तर, प्रधानमन्त्रीको पोखरा तथा मुस्ताङ भ्रमणबारे सुरक्षा निकायलाई भने औपचारिक जानकारी गराइएको छैन।

कास्कीका प्रहरी प्रवक्ता डीएसपी वीरेन्द्रकुमार पासवानले प्रधानमन्त्रीको भ्रमणबारे प्रधानमन्त्री कार्यालय वा गृह मन्त्रालयबाट कुनै औपचारिक जानकारी प्राप्त नभएको बताए।

‘हामीले पनि सञ्चारमाध्यममार्फत जानकारी पायौँ तर उहाँ आउनेबारे औपचारिक जानकारी प्राप्त भएको छैन,’ पासवानले भने।

राष्ट्रिय स्वतन्त्र पार्टी (रास्वपा) कास्कीका सभापति यदु अधिकारीले पनि प्रधानमन्त्रीको भ्रमणबारे पार्टीलाई औपचारिक जानकारी नभएको बताए। उनका अनुसार प्रहरीले भ्रमणबारे आफूहरूसँग जानकारी मागेको छ।

मुस्ताङ प्रहरीलाई पनि प्रधानमन्त्रीको भ्रमणबारे औपचारिक जानकारी पुगेको छैन। मुस्ताङ प्रहरी प्रमुख डीएसपी रामचन्द्र तिवारीले भीभीआईपी भ्रमणबारे जानकारी नआएको बताए। यद्यपि, सुरक्षा प्रबन्ध गर्न समस्या नरहेको उनको भनाइ छ।

स्रोतका अनुसार प्रधानमन्त्री शाह शुक्रबार अपराह्न पोखरा पुग्नेछन्। पोखरा पुगेपछि उनले कास्कीको अन्नपूर्ण गाउँपालिका–अस्तामस्थित एक रिसोर्टमा रात्रिबास गर्ने तयारी छ। उनका लागि उक्त रिसोर्ट बुक भइसकेको बताइएको छ।

प्रधानमन्त्री शाहले पोखरा र मुस्ताङको भ्रमण गर्ने कार्यक्रम रहे पनि सुरक्षा निकायलाई पूर्वजानकारी नगराइएको विषयले प्रधानमन्त्रीको भ्रमण व्यवस्थापन र सुरक्षा प्रोटोकलमाथि प्रश्न उठाएको छ।