काठमाडौं । फिफाले गत महिना सम्पन्न विश्वकपका क्रममा स्पेनसँगको खेलपछि भएको विवादास्पद घटनालाई लिएर अर्जेन्टिनाका खेलाडी, अफिसियल तथा फुटबल संघमाथि कारबाही गरेको छ।

जुलाई १९ मा मेटलाइफ स्टेडियममा स्पेनसँग १–० ले पराजित भएपछि अर्जेन्टिनाका खेलाडी तथा अफिसियलहरू स्पेनिस खेलाडीसँग झडपमा उत्रिएका थिए। उक्त घटनामा अर्जेन्टिनाका नाहुएल मोलिना, लिआन्द्रो परेडेस, थियागो अल्माडा तथा सहायक प्रशिक्षक रोबर्टो आयाला संलग्न रहेको फिफाले जनाएको छ।

शुक्रबार बसेको फिफा अनुशासन समितिको बैठकले परेडेसलाई १० खेलको प्रतिबन्धसँगै ९० हजार अमेरिकी डलर जरिबाना गरेको छ।

मोलिनालाई सात खेलको प्रतिबन्ध र ९० हजार डलर जरिबाना तथा अल्माडालाई एक खेलको प्रतिबन्ध र ३० हजार डलर जरिबाना तोकिएको छ। सहायक प्रशिक्षक आयालामाथि तीन खेलको प्रतिबन्ध र ३० हजार डलर जरिबाना गरिएको छ।

त्यस्तै, फिफाले खेलभावनाविपरीत गतिविधि तथा प्रतियोगिताका क्रममा भएका विभिन्न घटनाका लागि अर्जेन्टिना फुटबल संघलाई ३ लाख २१ हजार अमेरिकी डलर जरिबाना गरेको छ।

दुई घरेलु खेलमा दर्शक संख्या आधा

फिफाले अर्जेन्टिनालाई आगामी दुई घरेलु खेल ५० प्रतिशत दर्शक क्षमतामा मात्र सञ्चालन गर्नुपर्ने निर्णयसमेत गरेको छ।

अर्जेन्टिनाका समर्थकले गरेको भेदभावपूर्ण नारा तथा इसारा, विश्वकपपछि भएको झडप र विभिन्न खेलका क्रममा दर्शकले मैदानमा वस्तु फालेका घटनामाथि फिफाले अनुसन्धान गरेको थियो।

अर्जेन्टिना फुटबल संघले तिर्नुपर्ने ३ लाख २१ हजार डलरमध्ये १ लाख डलर रंगभेदविरुद्धको अभियानमा खर्च गर्नुपर्नेछ।

स्पेनका गाभी पनि कारबाहीमा

घटनामा संलग्न स्पेनिस खेलाडी पाब्लो मार्टिन पायेज गाभिरा (गाभी)लाई पनि फिफाले कारबाही गरेको छ। उनलाई एक खेलको प्रतिबन्धसँगै ३० हजार अमेरिकी डलर जरिबाना गरिएको छ।

Originally published on abcnews.com.np.