जनकपुरधाम । धनुषाको जनकपुरधाममा गुठीको अतिक्रमित जग्गा खाली गराउने अभियान सुरु गरिएको छ। शनिबार बिहानदेखि पोखरीका अतिक्रमित डिल खाली गराउन थालिएको हो।

अभियानको पहिलो चरणमा पोखरीका अतिक्रमित डिल खाली गरिनेछ। जनकपुरधाम क्षेत्रमा रहेका ५० वटा पोखरीमध्ये पहिलो चरणमा सातवटा पोखरीलाई अतिक्रमणमुक्त गराउने योजना रहेको जनाइएको छ।

पहिलो चरणको कामपछि मन्दिर परिसरका अतिक्रमित जग्गा खाली गराउने र त्यसपछि अन्य स्थानमा रहेका अतिक्रमण हटाउने योजना रहेको जनकपुरधाम उपमहानगरपालिकाले जनाएको छ।

उपमहानगरपालिकाका अनुसार पोखरीनजिक घर भएका केही व्यक्तिले पछाडिपट्टिबाट पोखरीको डिल अतिक्रमण गरी संरचना निर्माण गरेका छन्।

गुठीको अतिक्रमित जग्गा खाली गर्न गत साउन १ गते सूचना जारी गरिएको थियो। त्यसपछि शुक्रबार भदौ ५ गते जनकपुर नगर क्षेत्रमा माइकिङ गरी अतिक्रमित जग्गा खाली गर्न आग्रह गरिएको थियो।

सूचना र सार्वजनिक आह्वानका बाबजुद स्थानीयले आफैँ अतिक्रमित संरचना नहटाएपछि डोजर प्रयोग गरी संरचना हटाउन थालिएको उपमहानगरपालिकाले जनाएको छ।

Originally published on abcnews.com.np.