ट्रम्पले ९० दिनसम्म ३ लाख टन गाईको मासु भन्साररहित आयात गर्न दिने

वासिङ्टन डीसी । अमेरिकी राष्ट्रपति डोनाल्ड ट्रम्पले गाईको मासुको बढ्दो मूल्य नियन्त्रण गर्न आगामी ९० दिनसम्म तीन लाख मेट्रिक टनसम्म ‘ग्राउन्ड बिफ’ आयातमा अतिरिक्त भन्सार शुल्क नलाग्ने व्यवस्था गर्ने घोषणा गरेका छन्।

ट्रम्पले शुक्रबार सामाजिक सञ्जाल ‘ट्रुथ सोसल’मार्फत यस्तो घोषणा गरेका हुन्। उनले आयात हुने मासु हालको बजार मूल्यभन्दा २५ प्रतिशत कममा बिक्री हुने प्रतिबद्धता रहेको बताएका छन्।

ट्रम्पले आयात गरिने मासु कुन–कुन देशबाट आउने भन्नेबारे भने स्पष्ट जानकारी दिएका छैनन्। यो व्यवस्था कार्यान्वयनका लागि कार्यकारी आदेश जारी गर्ने तयारी रहेको अमेरिकी सञ्चारमाध्यमहरूले जनाएका छन्।

अमेरिकामा गाईको मासुको मूल्य पछिल्लो समय उच्च बिन्दुमा पुगेको छ। घट्दो गाईवस्तुको संख्या, लामो समयदेखिको खडेरी, उत्पादन तथा प्रशोधन लागत र आपूर्ति समस्याका कारण मूल्य बढेको बताइएको छ।

ट्रम्प प्रशासनले सस्तो आयातमार्फत उपभोक्तालाई राहत दिने र यसबीच अमेरिकी पशुपालकलाई गाईवस्तुको संख्या पुनः बढाउन समय उपलब्ध गराउने उद्देश्य रहेको जनाएको छ।

तर सरकारको निर्णयप्रति अमेरिकी पशुपालक तथा उद्योग संगठनहरूले आपत्ति जनाएका छन्। उनीहरूले सस्तो विदेशी मासुको आयात बढ्दा घरेलु उत्पादकलाई असर पर्ने र अमेरिकी गाईवस्तुको संख्या पुनः बढाउने प्रयास कमजोर हुन सक्ने बताएका छन्।

विश्लेषकहरूले भने तीन लाख मेट्रिक टन आयातले अमेरिकी कुल गाईको मासुको मागको तुलनात्मक रूपमा सानो हिस्सा मात्रै ओगट्ने भएकाले यसबाट मूल्यमा कति प्रभाव पर्छ भन्नेमा प्रश्न उठाएका छन्।

Originally published on abcnews.com.np.