पोखरा । प्रधानन्यायाधीश डा. मनोजकुमार शर्माले उच्च अदालत पोखरा र कास्की जिल्ला अदालतको निरीक्षण गरेका छन्। उनले दुवै अदालतको निरीक्षण गर्दै न्याय सम्पादन तथा सेवा प्रवाहको अवस्थाबारे जानकारी लिएका हुन्।

प्रधानन्यायाधीश शर्माले गत वर्षको ‘जेनजी’ आन्दोलनका क्रममा आगजनीबाट क्षतिग्रस्त अदालत भवनको समेत अवलोकन गरेका सर्वोच्च अदालतका उपरजिस्ट्रार राजेन्द्र पौडेलले जानकारी दिए।

‘जेनजी आन्दोलनका क्रममा क्षति पुगेका अदालत भवनको अवलोकन तथा अनुगमनका सिलसिलामा प्रधानन्यायाधीश पोखरा आइपुग्नुभएको हो,’ उनले भने, ‘शनिबार उहाँले उच्च अदालत पोखरा, बागलुङ इजलास, जिल्ला अदालत बागलुङ र जिल्ला अदालत म्याग्दीको पनि निरीक्षण गर्नुहुने कार्यक्रम छ।’

जेनजी आन्दोलनका क्रममा उच्च अदालत पोखरा, कास्की जिल्ला अदालत र तनहुँ जिल्ला अदालतमा आगजनी हुँदा भवन तथा भौतिक संरचनामा क्षति पुगेको थियो।

अदालत भवनमा क्षति पुगेपछि न्याय सम्पादन तथा समग्र सेवा प्रवाहमा कठिनाइ भइरहेको अवस्थामा प्रधानन्यायाधीश शर्माले भवन पुनर्निर्माणको काम अघि बढाउन पहल गरेको उपरजिस्ट्रार पौडेलले बताए।

प्रधानन्यायाधीश शर्माले नेपाल बार एसोसिएसन, पोखरा महानगरपालिकाका प्रतिनिधिलगायत सरोकारवालासँग कास्की जिल्ला अदालतको भवन निर्माणका लागि जग्गा व्यवस्थापनलगायत विषयमा छलफलसमेत गरेका छन्।

भवनमा क्षति पुगेपछि उच्च अदालत पोखरा र कास्की जिल्ला अदालतले हाल अस्थायी संरचनाबाट इजलास सञ्चालन गर्दै आएका छन्।

Originally published on abcnews.com.np.