काठमाडौं । नेकपा नेतृ पम्फा भुसालले कम्युनिस्ट पार्टीहरूबीच एकता आवश्यक रहेको बताएकी छन्। नेकपा कोशी प्रदेश सम्पर्क समितिले काठमाडौंमा आयोजना गरेको कार्यक्रमलाई सम्बोधन गर्दै उनले एकताको नाममा ठूलो र भद्दा संगठन बनाउनु उचित नहुने धारणा व्यक्त गरिन्।

भुसालले केन्द्रीय कार्य संयोजन समितिमा संगठनको संरचनाबारे छलफल भइरहेको जानकारी दिँदै अहिलेका कमिटीहरूमा दोहोरो संवाद हुने अवस्था नरहेको बताइन्।

उनले भनिन्, “तलका समितिहरू यति ठूला बनेर गएका छन्, जहाँ दोहोरो संवाद हुँदैन। यहाँ केन्द्रीय सदस्यकै यो लाइन उस्तै छ। दोहोरो संवाद हुने गरेर हाम्रा कमिटी बनेका छैनन्।”

भुसालले विगतमा कम्युनिस्ट हुनुको अर्थ त्याग, आदर्श र निष्ठासँग जोडिने गरेको भए पनि पछिल्लो समय पदकेन्द्रित प्रवृत्ति बढेको आरोप लगाइन्। भुसालले पदाधिकारीस्तरको कमिटी नै ४५ सदस्यीय रहेको उल्लेख गर्दै अत्यधिक ठूलो केन्द्रीय समिति प्रभावकारी हुन नसक्ने बताइन्।

उनले भनिन्, “दर्जन सह–इन्चार्ज, दर्जन सह–संयोजक आदि–इत्यादि पनि हाम्रा निम्ति स्वीकार्य छन्। २४ सय ९९ सदस्यको केन्द्रीय समिति यो कम्युनिस्ट पार्टी बन्ने बाटो होइन।” भुसालले आगामी मंसिरमा हुने महाधिवेशनमार्फत चुस्त–दुरुस्त कम्युनिस्ट पार्टी निर्माण गर्ने बताइन्। उनले पार्टी एकता र आन्तरिक संवादलाई प्राथमिकता दिँदै संगठनको आकारभन्दा प्रभावकारी कार्यसम्पादनमा ध्यान दिनुपर्नेमा जोड दिइन्। उनका अनुसार ठूलो आकारको केन्द्रीय समिति कम्युनिस्ट पार्टीको संगठनात्मक आचरणअनुकूल नहुने भएकाले महाधिवेशनमार्फत संगठनलाई व्यवस्थित र प्रभावकारी बनाउने लक्ष्य राखिएको छ।

Originally published on abcnews.com.np.