हेटौंडा । मकवानपुरको भीमफेदी गाउँपालिका-८, ईपास्थित माण्डु हाइड्रोपावरको पानी छान्ने जालीमा अज्ञात महिलाको शव फेला परेको छ। शनिबार बिहान करिब ७ः३० बजे बागमती खोलाले बगाएर ल्याएको अन्दाजी ३५ देखि ४० वर्षीया महिलाको शव सोही हाइड्रोपावरको पानी छान्ने जालीमा अड्किएको अवस्थामा फेला परेको मकवानपुर प्रहरीले जनाएको हो।

जिल्ला प्रहरी कार्यालय मकवानपुरका प्रहरी नायव उपरीक्षक डीएसपी माधवप्रसाद काफ्लेका अनुसार, शव फेला परेको सूचना प्राप्त हुनासाथ इलाका प्रहरी कार्यालय भीमफेदीबाट प्रहरी निरीक्षकसहितको टोली घटनास्थल पुगेको थियो। प्रहरी टोलीले घटनास्थल तथा शव जाँच मुचुल्कालगायत प्रारम्भिक अनुसन्धानको काम पूरा गरेको छ।

प्रहरीका अनुसार, शव पोस्टमार्टमका लागि हेटौँडा अस्पतालको शवगृहमा राखिएको छ। मृतकको नाम, थर र ठेगाना भने हालसम्म खुल्न सकेको छैन। मृतकका आफन्तसमेत हालसम्म सम्पर्कमा नआएपछि जिल्ला प्रहरी कार्यालय मकवानपुरले हुलिया परिपत्र जारी गरी पहिचानका लागि सार्वजनिक सूचना गरेको छ।

प्रहरीका अनुसार, मृतक महिलाको उचाइ करिब ५ फिट ३ इन्च, ठिक्कको मोटो शरीर र कालो लामो कपाल रहेको छ। शव फेला परेको अवस्थामा उनले कलेजी रंगको ब्रा लगाएको प्रहरीले जनाएको छ। मकवानपुर प्रहरीले मृतकलाई चिन्ने वा उनका आफन्तहरूलाई जिल्ला प्रहरी कार्यालय मकवानपुरमा सम्पर्क गरी शवको सनाखत गर्न अनुरोध गरेको छ।

शवको अवस्था

प्रहरी नायव उपरीक्षक काफ्लेले जानकारी दिए अनुसार, शव बागमती खोलाबाट बगेर आएको देखिन्छ। माण्डु हाइड्रोपावरको जालीमा अड्किएकाले स्थानीयवासीले देखेपछि प्रहरीलाई खबर गरेका थिए। घटना थप अनुसन्धानको लागि राखिएको छ र सनाखत हुन सकेन भने डीएनए परीक्षण समेत गरिने प्रहरीले बताएको छ।

Originally published on abcnews.com.np.