म्याग्दी । मालिका गाउँपालिका–१ निस्कोट डाँसा सिरदीका गंगाराम पौडेलले वैदेशिक रोजगारीमा बिताएको दुई दशकपछि स्वदेश फर्किएर सुरु गरेको व्यवसायबाट अहिले सात जनाले रोजगारी पाएका छन्।

४४ वर्षीय पौडेल २०५८ सालमा रोजगारीका लागि मलेसिया गएका थिए। त्यहाँ पाँच वर्ष पाँच महिना काम गरेपछि बहराइनमा एक वर्ष, कतारमा साढे चार वर्ष, संयुक्त अरब इमिरेट्सको आबुधाबीमा चार वर्ष र ओमानमा छ वर्ष काम गरे। करिब दुई दशक विदेशमा बिताएपछि उनी २०७६ सालमा नेपाल फर्किए।

विभिन्न देशमा काम गर्दै अवसर खोज्ने क्रममा उनको मनमा भने आफ्नै गाउँ फर्किएर व्यवसाय गर्ने सोच निरन्तर रह्यो। विदेशमा रहँदा परिवार र सन्तानबाट टाढा बस्नुपर्दाको अनुभवले उनको स्वदेश फर्किने चाहनालाई अझ बलियो बनायो।

‘हरेक दसैंमा गाउँ सम्झिन्थेँ, तिहारमा देउसीभैलोको आवाज सम्झिन्थेँ। सन्तान हुर्किरहेको खबर फोनबाट सुन्थेँ। बाबु भएर पनि छोराछोरीको बालापनसँगै हिँड्न नपाउनु सबैभन्दा ठूलो पीडा थियो,’ पौडेलले भने।

उनका जेठा छोरा २० वर्षका छन् र कक्षा १२ उत्तीर्ण गरिसकेका छन्। कान्छा छोरा १७ वर्षका छन् भने १२ वर्षीया छोरी कक्षा ७ मा अध्ययनरत छिन्।

‘विदेशमा पैसा कमाइयो, तर सन्तानको बाल्यकाल फेरि फर्केर आउँदैन रहेछ,’ पौडेलले भने।

रोजगारी खोज्न होइन, दिन व्यवसाय

नेपाल फर्किएपछि तत्कालीन मालिका गाउँपालिका–६ का वडाध्यक्ष सन्तोष सुवेदीले विदेशबाट फर्किएका युवाले पुनः विदेश जानेभन्दा गाउँमै व्यवसाय सुरु गर्नुपर्ने सुझाव दिएका थिए। त्यही सुझावबाट आफू व्यवसायमा लागेको पौडेल बताउँछन्।

‘रोजगारी खोज्ने होइन, अब रोजगारी दिने मानिस बन्नुपर्छ भन्ने सल्लाह पाएँ,’ उनले भने।

२०७८ सालमा उनले दरवाङ बजारमा ‘प्रकृति मोटर पार्ट्स तथा वर्कसप’ सञ्चालनमा ल्याए। पश्चिम म्याग्दीका विभिन्न गाउँबाट दरवाङ हुँदै दैनिक सयौँ मोटरसाइकल आवतजावत गर्ने भएकाले मोटरसाइकल मर्मत र पार्टपुर्जाको आवश्यकता बढी रहेको उनले पहिचान गरे।

पहाडी भूगोल, उकालो–ओरालो र कच्ची सडकका कारण मोटरसाइकल बिग्रँदा सामान्य मर्मतका लागि समेत टाढा जानुपर्ने समस्या थियो। आवश्यक पार्टपुर्जा समेत सहजै नपाइने अवस्थालाई उनले व्यवसायको अवसर बनाए।

हाल उनको वर्कसपमा परिवारका तीन जनासहित चार बाह्य कर्मचारीले काम गरिरहेका छन्। व्यवसायले प्रत्यक्ष रूपमा सात जनालाई रोजगारी दिएको पौडेलले बताए।

स्थानीयलाई सहज

मोटरसाइकल मर्मत तथा आवश्यक पार्टपुर्जा एकै ठाउँमा उपलब्ध हुन थालेपछि पश्चिम म्याग्दीका स्थानीयलाई सहज भएको छ।

मालिका गाउँपालिका–६ का वडाध्यक्ष पथबहादुर रोकाले गाउँपालिकाको कार्यालय अगाडि सञ्चालनमा रहेको व्यवसायले स्थानीयलाई ठूलो सुविधा दिएको बताए।

मालिका गाउँपालिकाका अध्यक्ष वेगप्रसाद गर्बुजाले एक समय आफैँ रोजगारी खोज्दै विभिन्न देश पुगेका पौडेलले अहिले सात जनाका लागि रोजगारी सिर्जना गर्नु प्रेरणादायी भएको बताए।

विदेशमा दुई दशक बिताएर फर्किएका पौडेलको अनुभवमा स्वदेशमै व्यवसाय सञ्चालन गर्दा आम्दानीसँगै परिवार र समाजसँगै बस्ने अवसर पनि प्राप्त भएको छ। ‘विदेशमा पैसा कमाइयो, तर सन्तानको बाल्यकाल फेरि फर्केर आउँदैन रहेछ,’ उनले भने।

Originally published on abcnews.com.np.