विराटनगर । कोसी प्रदेशका मुख्यमन्त्री हिक्मतकुमार कार्कीले देश, समाज र जनताको हित हुने गरी सत्य र तथ्यमा आधारित पत्रकारिता गर्न आग्रह गरेका छन्।

नेपाल पत्रकार महासंघ कोसी प्रदेशले मंगलबार आयोजना गरेको ‘पत्रकार दुर्घटना बिमा’ कार्यक्रम शुभारम्भ गर्दै मुख्यमन्त्री कार्कीले सत्य र तथ्यमा आधारित पत्रकारिताले मात्र समाजलाई बलियो बनाउने बताए।

उनले पत्रकारको दुर्घटना बिमा प्रभावकारी बनाउन बिमा कम्पनीहरूले बीमितलाई भुक्तानी गर्ने प्रक्रिया सहज र सरल बनाउनुपर्नेमा जोड दिए।

प्रदेश सरकारले स्थापना गरेको प्रदेश सञ्चार प्रतिष्ठानमार्फत पत्रकारको हकहितका लागि आवश्यक काम गर्न बजेटको अभाव हुन नदिने प्रतिबद्धता पनि मुख्यमन्त्री कार्कीले जनाए।

आफ्नो नेतृत्वको प्रदेश सरकारले सबै राजनीतिक दलसँग सहकार्य गर्दै काम गरिरहेको उल्लेख गर्दै उनले पत्रकार तथा व्यवसायीलाई आफ्नो पेसामा टिकाइराख्न बिमा क्षेत्रको महत्वपूर्ण भूमिका रहने बताए।

जोखिमपूर्ण पेसा पत्रकारिता

कोसी प्रदेशका आन्तरिक मामिला तथा कानुनमन्त्री गोम्बु शेर्पाले पत्रकारिता साहसिक तथा जोखिमपूर्ण पेसा भएकाले दुर्घटना बिमा कार्यक्रमबाट पत्रकार लाभान्वित हुने बताए।

उनका अनुसार कोसी प्रदेशका १ हजार २०० पत्रकारको एक वर्षको दुर्घटना बिमाको खर्च प्रदेश सरकारले व्यहोरेको छ।

नेपाल पत्रकार महासंघले आवश्यकता महसुस गरे आगामी दिनमा पनि दुर्घटना बिमा कार्यक्रमलाई निरन्तरता दिन प्रदेश सरकार सकारात्मक रहेको मन्त्री शेर्पाले बताए।

Originally published on abcnews.com.np.