काठमाडौं । काठमाडौंको भृकुटीमण्डपमा आजदेखि सुरु भएको नाडा अटो शो २०२६ लाई लक्षित गर्दै बैंक तथा वित्तीय संस्थाले सवारी कर्जामा विभिन्न सहुलियत योजना ल्याएका छन्।

अटो शोमा सहभागी बैंकहरूले छुट्टाछुट्टै स्टल राखेर सवारी खरिद गर्ने ग्राहकलाई कर्जा तथा वित्तीय सेवासम्बन्धी जानकारी र सुविधा उपलब्ध गराइरहेका छन्। अधिकांश बैंकले करिब ५.९९ प्रतिशत आसपासको ब्याजदरमा सवारी कर्जा दिने योजना ल्याएका छन्।

एनआईसी एशिया बैंकले ‘सपनाको गाडी अब तपाईंकै अगाडि’ नारासहित ५.९९ प्रतिशत स्थिर ब्याजदरमा अधिकतम सात वर्षका लागि सवारी कर्जा उपलब्ध गराउने जनाएको छ।

त्यस्तै, नबिल बैंकले ५.१७ प्रतिशत, नेपाल बैंकले ५.६३ प्रतिशत र प्रभु बैंकले ५.५२ प्रतिशत ब्याजदरमा कर्जा योजना ल्याएका छन्। ग्लोबल आइएमई बैंकले ५.७ प्रतिशत ब्याजदरमा सवारी कर्जा उपलब्ध गराउने जनाएको छ।

कृषि विकास बैंकले भने प्रिमियममा ३३ प्रतिशत छुटसहितको कर्जा योजना सार्वजनिक गरेको छ।

तत्काल कर्जा उपलब्ध गराउने सुविधा

नाडा अटो शोमा सात वटा वाणिज्य बैंकले सवारी खरिद गर्ने ग्राहकलाई कर्जा प्रक्रियामा सहजीकरण गर्दै तत्काल सेवा उपलब्ध गराउने व्यवस्था गरेका छन्।

बैंकहरूले ग्राहकलाई आकर्षित गर्न ७ देखि १० वर्षसम्मको कर्जा अवधि, प्रतिस्पर्धी ब्याजदर तथा केही योजनामा स्थिर ब्याजदरको सुविधा दिएका छन्।

अटो शोमा सवारी खरिदको निर्णय गर्ने ग्राहकले प्रदर्शनीस्थलमै बैंकका प्रतिनिधिबाट कर्जा प्रक्रिया, आवश्यक कागजात, ब्याजदर र भुक्तानी अवधिबारे जानकारी लिन सक्ने व्यवस्था गरिएको छ।

नाडा अटो शोमा सवारीसाधनसँगै बैंक तथा वित्तीय संस्थाका कर्जा योजनाले पनि ग्राहकको ध्यान तानेका छन्।

Originally published on abcnews.com.np.