काठमाडौं । चिनियाँ प्रिमियम विद्युतीय सवारी ब्रान्ड अवतारको नयाँ इलेक्ट्रिक एसयूभी ‘अवतार ०७’ नेपाली बजारमा सार्वजनिक भएको छ।

नाडा अटो शोमा एमएडब्लु वृद्धिले अवतार ०७ का दुई भेरिएन्ट सार्वजनिक गरेको हो। कम्पनीले यसको मूल्य क्रमशः २ करोड २० लाख र २ करोड ३० लाख रुपैयाँ तोकेको छ। प्रिमियम विद्युतीय एसयूभी खोज्ने ग्राहकका लागि नयाँ विकल्पका रूपमा अवतार ०७ प्रस्तुत गरिएको कम्पनीले जनाएको छ।

अवतार ०७ मा ८२.१६ किलोवाट आवरको ब्याट्री जडान गरिएको छ। कम्पनीका अनुसार एकपटक पूर्ण चार्ज गर्दा यसले ६५० किलोमिटरसम्मको रेन्ज दिन सक्छ।

एसयूभीमा १९० किलोवाट क्षमताको इलेक्ट्रिक मोटर रहेको छ, जसले अधिकतम ३६५ एनएम टर्क उत्पादन गर्छ। रियर ह्विल ड्राइभ सिस्टम रहेको अवतार ०७ ले ० देखि १०० किलोमिटर प्रतिघण्टाको गति ७.७ सेकेन्डमा लिन सक्ने तथा अधिकतम गति २०० किलोमिटर प्रतिघण्टा रहेको कम्पनीले जनाएको छ।

१० मिनेटमै ३० देखि ८० प्रतिशत चार्ज

अवतार ०७ मा २५० किलोवाट डीसी फास्ट चार्जिङको सुविधा रहेको छ। यसमार्फत ब्याट्रीलाई ३० प्रतिशतबाट ८० प्रतिशतसम्म करिब १० मिनेटमा चार्ज गर्न सकिने कम्पनीको दाबी छ।

गाडीमा ३.३ किलोवाट क्षमताको भेहिकल–टु–लोड (भी२एल) सुविधा पनि उपलब्ध छ। म्याग्नेसियम–एल्युमिनियम एलोय सस्पेन्सन तथा रियर ह्विल ड्राइभका कारण ड्राइभिङ र ह्यान्डलिङ थप आरामदायी र प्रिमियम हुने कम्पनीले जनाएको छ।

सुरक्षा र प्रविधि

अवतार ०७ मा ९ वटा एयरब्याग, एबीएस, ईबीडी, ईएससी, ट्र्याक्सन कन्ट्रोल, ब्रेक असिस्ट र हिल होल्डलगायत सुरक्षा फिचर राखिएको छ।

त्यस्तै, गाडीमा ३५.४ इन्चको फोरके प्यानोरामिक डिस्प्ले र १५.६ इन्चको इन्टेलिजेन्स सेन्टर स्क्रिन रहेको छ।

अवतार ०७ नाडा अटो शोमार्फत सार्वजनिक भएसँगै नेपाली प्रिमियम ईभी बजारमा थप प्रतिस्पर्धा बढ्ने अपेक्षा गरिएको छ।

अवतार ०७ का तस्वीर सरोज नेपालले खिचेका हुन्।

Originally published on abcnews.com.np.