काठमाडौं । पाकिस्तानका पूर्वप्रधानमन्त्री इमरान खानका छोरा सुलेमान खानले आफ्ना बुवालाई जेलमै बिस्तारै मार्ने प्रयास भइरहेको आरोप लगाएका छन्।

इमरान खानका वकिल जेरेड जेन्सरले मंगलबार आयोजना गरेको अनलाइन पत्रकार सम्मेलनमा बोल्दै सुलेमानले जेलमा रहेका बुवाको स्वास्थ्य र सुरक्षालाई लिएर गम्भीर चिन्ता व्यक्त गरेका हुन्।

सुलेमानका अनुसार उनले र परिवारका सदस्यले इमरान खानसँग पछिल्लोपटक मार्चमा फोनमार्फत कुरा गरेका थिए। त्यसयता परिवारलाई उनीसँग फोनमा सम्पर्क गर्न अनुमति नदिइएको उनको दाबी छ।

‘हामीले अन्तिमपटक मार्चमा उहाँसँग फोनमा कुरा गरेका थियौँ। त्यसपछि उहाँसँग कुरा गर्न अनुमति दिइएन,’ सुलेमानले भने, ‘हामीले कुरा गर्दा उहाँ उत्साहित देखिनुहुन्थ्यो, तर निरन्तर एकान्तवासले उहाँलाई असर गरिरहेको छ।’

उनले हालै आफ्नी काकीले इमरान खानलाई जेलमा भेटेको र भेटका क्रममा इमरानले आफूलाई जेलमै बिस्तारै मार्ने प्रयास भइरहेको महसुस भएको बताएको दाबी गरे।

पत्रकार सम्मेलनमा इमरानका अर्का छोरा कासिम खानले पनि बुवाको स्वास्थ्य अवस्थाबारे स्वतन्त्र चिकित्सकबाट परीक्षण र उपचार गराउन माग गरे।

‘हामी स्वतन्त्र चिकित्सकहरूले उहाँको उपचार गरून् भन्ने चाहन्छौँ,’ कासिमले भने, ‘हामी उहाँलाई निष्पक्ष अस्पतालमा उपचार गराउन चाहन्छौँ। सरकारले उहाँ पूर्ण रूपमा स्वस्थ हुनुहुन्छ भन्छ भने त्यसको प्रमाण सार्वजनिक गर्नुपर्छ।’

सर्वोच्च अदालतको आदेशपछि अस्पताल लगेर पुनः जेल फर्काइयो

गत अगस्ट १८ मा पाकिस्तानको सर्वोच्च अदालतले इमरान खानलाई उपचारका लागि इस्लामाबादस्थित सिफा अस्पताल लैजान र सेप्टेम्बर १६ सम्म अस्पतालमै राखेर उपचार गर्न आदेश दिएको बताइएको छ।

आदेशपछि उनलाई गत बिहीबार राति आदियाला जेलबाट अस्पताल लगिएको थियो। तर, उपचार आवश्यक नरहेको भन्दै भोलिपल्ट बिहानै उनलाई पुनः जेल फर्काइएको दाबी गरिएको छ।

यस घटनापछि इमरान खानको पार्टी पाकिस्तान तहरिक–ए–इन्साफ (पीटीआई)का वर्तमान अध्यक्ष ब्यारिस्टर गौहर अली खानले सरकारविरुद्ध अदालतको अवहेलनासम्बन्धी निवेदन दायर गरिने बताएका छन्।

लन्डनमा रहेका छोराहरूको बढ्दो चिन्ता

इमरान खानका दुई छोरा सुलेमान र कासिम आफ्नी आमा जेमिमा गोल्डस्मिथसँग लन्डनमा बस्दै आएका छन्। जेमिमा इमरान खानकी पूर्वपत्नी हुन्।

यसअघि जेमिमाले पनि सामाजिक सञ्जालमार्फत इमरान खानको स्वास्थ्य र सुरक्षालाई लिएर गम्भीर चिन्ता व्यक्त गरेकी थिइन्। उनले आफ्ना पूर्वपतिको अवस्थाबारे ध्यानाकर्षण गराउँदै सहयोगका लागि बेलायती सरकारसँग आग्रहसमेत गरेकी थिइन्।

इमरान खान लामो समयदेखि विभिन्न मुद्दामा जेलमा रहेका छन्। पछिल्लो समय उनको स्वास्थ्य अवस्था, जेलभित्रको बसाइ र उपचारको विषयलाई लिएर परिवार तथा पीटीआईले प्रश्न उठाउँदै आएका छन्।

Originally published on abcnews.com.np.