काठमाडौं । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले रसुवाको भोटेकोसी नदीमा आएको भीषण बाढीपछि प्रभावित क्षेत्रमा तत्काल उद्धार, राहत तथा मानवीय सेवामा जुट्न पार्टीका नेता–कार्यकर्तालाई निर्देशन दिएका छन्।

बुधबार बिहान तिब्बततर्फबाट आएको ठूलो बाढीले रसुवाको टिमुरे, स्याफ्रुबेँसीलगायत क्षेत्रमा व्यापक क्षति पुर्‍याएको खबर सार्वजनिक भएपछि प्रचण्डले स्थानीय प्रशासनसँग समन्वय गर्दै उद्धार तथा राहत कार्यमा सक्रिय हुन पार्टी पंक्तिलाई आग्रह गरेका हुन्।

बाढीका कारण रसुवा मात्र नभई नुवाकोट, धादिङ, गोरखा र चितवनका नदी तटीय क्षेत्रसमेत जोखिममा पर्न सक्ने भन्दै उनले ती क्षेत्रका नागरिकलाई उच्च सतर्कता अपनाउन आग्रह गरेका छन्। उनले सुरक्षित स्थानमा रहन तथा स्थानीय प्रशासन र सुरक्षा निकायबाट जारी निर्देशन पूर्ण रूपमा पालना गर्न अपिल गरेका छन्।

प्रचण्डले विपद्को यस घडीमा नागरिकको जीवनरक्षा सबैभन्दा महत्वपूर्ण दायित्व भएको उल्लेख गर्दै उद्धार तथा राहत कार्यमा सबै पक्ष एकजुट हुनुपर्ने बताएका छन्।

उनले संघ, प्रदेश र स्थानीय सरकार, सुरक्षा निकाय, राजनीतिक दल, नागरिक समाज तथा आम नागरिकबीच प्रभावकारी समन्वय आवश्यक रहेको भन्दै खोज, उद्धार, राहत र मानवीय सहयोगका कामलाई तीव्र र व्यवस्थित बनाउन आग्रह गरेका छन्।

तटीय क्षेत्रमा उच्च सतर्कताको अपिल

रसुवा हुँदै त्रिशूली नदीका तल्लो तटीय क्षेत्रसम्म बाढीको जोखिम बढ्न सक्ने अवस्थालाई ध्यानमा राख्दै प्रचण्डले नदीकिनारमा बसोबास गर्ने नागरिकलाई विशेष सतर्कता अपनाउन आग्रह गरेका छन्।

उनले सम्भावित जोखिमलाई बेवास्ता नगर्न, आवश्यक परे तत्काल सुरक्षित स्थानमा सर्न र आधिकारिक निकायबाट जारी सूचना तथा चेतावनीलाई प्राथमिकताका साथ पालना गर्न सबैसँग अपिल गरेका छन्।

Originally published on abcnews.com.np.