सिन्धुपाल्चोक । चीनतर्फ पहिरोका कारण थुनिएको भोटेकोसी नदीको ताल अझै पूर्ण रूपमा नखुलेपछि नेपालतर्फ बाढीको जोखिम कायमै रहेको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार चिनियाँ अधिकारीहरूबाट प्राप्त पछिल्लो सूचनामा नदी थुनिएको स्थानमा बनेको ताल अझै पूर्ण रूपमा नखुलेको जनाइएको छ ।

बुधबार दिउँसो १ बजेर ३५ मिनेटमा चिनियाँ अधिकारीहरूले पठाएको सूचनामा नदी थुनिएको क्षेत्रमा पानीको निकास पूर्ण रूपमा हुन नसकेको उल्लेख छ । यसका कारण भोटेकोसी तथा त्रिशूली नदी आसपासका क्षेत्रमा जोखिम कायमै रहेको प्राधिकरणले जनाएको छ ।

प्राधिकरणले भोटेकोसी र त्रिशूली नदी आसपासका बासिन्दालाई अर्को सूचना जारी नभएसम्म नदीबाट टाढा सुरक्षित स्थानमा रहन आग्रह गरेको छ ।

चीनतर्फबाट थप सूचना प्राप्त हुने क्रम जारी रहेको र नदीको अवस्था तथा सम्भावित जोखिमबारे निरन्तर अनुगमन भइरहेको प्राधिकरणले जनाएको छ ।

बाढीको जोखिम कायमै

चीनमा गएको पहिरोले भोटेकोसी नदी अवरुद्ध भएपछि नदीमा पानी थुनिएर ताल बनेको हो । ताल पूर्ण रूपमा नखुलेका कारण पानी एक्कासि बाहिरिएमा नेपालतर्फ बाढी आउन सक्ने जोखिम रहेको प्राधिकरणको भनाइ छ ।

यसअघि पनि चिनियाँ पक्षले नदी थुनिएको जानकारी गराएको थियो । पछिल्लो सूचनाअनुसार ताल पूर्ण रूपमा नखुलेपछि भोटेकोसी र त्रिशूली नदी आसपासका क्षेत्रमा उच्च सतर्कता अपनाउन आग्रह गरिएको छ ।

Originally published on abcnews.com.np.