काठमाडौँ । सिंहदरबारमा आज बिहान प्रमुख राजनीतिक दलका शीर्ष नेताहरू सम्मिलित सर्वदलीय बैठक सुरु भएको छ। सत्तारुढ राष्ट्रिय स्वतन्त्र पार्टी (रास्वपा) का सभापति रवि लामिछानेको आह्वानमा बैठक बसेको हो।

बैठकमा नेपाली कांग्रेसका सभापति गगन थापा, नेकपा (एमाले)का महासचिव शङ्कर पोखरेल, नेपाली कम्युनिस्ट पार्टीका संयोजक पुष्पकमल दाहाल, श्रम संस्कृति पार्टीका ध्रुवराज राई, राष्ट्रिय प्रजातन्त्र पार्टीका अध्यक्ष राजेन्द्र लिङ्देन, जनता समाजवादी पार्टी नेपालका अध्यक्ष उपेन्द्र यादव तथा नेता महन्थ ठाकुरलगायत सहभागी छन्।

भोटेकोशी नदीमा आएको भीषण बाढीबाट भएको जनधनको क्षति, बेपत्ताको खोजी तथा उद्धार, राहत वितरण र प्रभावितको पुनःस्थापनालगायत विषयमा बैठकमा छलफल भइरहेको छ।

विपद् व्यवस्थापनमा साझा पहल

रास्वपा सभापति लामिछानेले प्राकृतिक विपद्का कारण उत्पन्न संकट समाधानका लागि प्रमुख राजनीतिक दलहरूबीच साझा धारणा र सहकार्य आवश्यक रहेको भन्दै बैठक बोलाएका हुन्।

बैठकमा बाढीमा बेपत्ता भएकाहरूको खोजीलाई थप प्रभावकारी बनाउने, उद्धार गरिएकाहरूको उचित व्यवस्थापन गर्ने तथा प्रभावित क्षेत्रमा तत्काल राहत र अत्यावश्यक सामग्री पुर्‍याउने विषयमा छलफल हुने बताइएको छ।

साथै, विपद्पछिको पुनःस्थापना तथा क्षतिग्रस्त पूर्वाधार पुनर्निर्माणमा राजनीतिक दलहरूले निर्वाह गर्नुपर्ने भूमिकाबारे समेत बैठकमा छलफल हुने अपेक्षा गरिएको छ।

Originally published on abcnews.com.np.