धनगढी । रसुवाको भोटेकोशी नदीमा आएको विनाशकारी बाढीबाट भएको जनधनको क्षतिप्रति सुदूरपश्चिम प्रदेश सरकारले दुःख व्यक्त गर्दै विपद् व्यवस्थापनका लागि संघीय सरकारलाई पूर्ण सहयोग गर्ने प्रतिबद्धता जनाएको छ।

सुदूरपश्चिम प्रदेशका मुख्यमन्त्री खगराज भट्टले विज्ञप्ति जारी गर्दै संघीय सरकारले सञ्चालन गरिरहेको खोज, उद्धार, राहत तथा पुनःस्थापनाका कार्यमा प्रदेश सरकार ऐक्यबद्ध रहेको बताएका छन्। उनले सम्बन्धित निकायलाई खोज, उद्धार तथा राहतका कामलाई थप तीव्रता दिन आग्रह गरेका छन्।

मुख्यमन्त्री भट्टले बाढी तथा पहिरोको जोखिममा रहेका नागरिकलाई सुरक्षित स्थानमा बस्न तथा नदीकिनारा र जोखिमपूर्ण क्षेत्रमा यात्रा नगर्न अपिल गरेका छन्। साथै, सरकार तथा सम्बन्धित निकायबाट जारी हुने सूचना र निर्देशनको पालना गर्न उनले आग्रह गरेका छन्।

विपद्को समयमा संघ, प्रदेश र स्थानीय तहका सरकार, सुरक्षा निकाय, स्थानीय समुदाय तथा विभिन्न संघसंस्थाबीच प्रभावकारी समन्वय आवश्यक रहेको मुख्यमन्त्री भट्टले बताएका छन्।

उनले रसुवा, नुवाकोट, धादिङ, गोरखा, चितवनलगायत क्षेत्रमा बाढीले पुर्‍याएको ठूलो जनधनको क्षतिप्रति दुःख व्यक्त गर्दै शोकसन्तप्त परिवारजनप्रति समवेदना प्रकट गरेका छन्।

प्रारम्भिक विवरणअनुसार सुदूरपश्चिम प्रदेशका विभिन्न क्षेत्रबाट रोजगारीका लागि गएका केही नागरिकसमेत बेपत्ता भएको जानकारी आएको भन्दै मुख्यमन्त्री भट्टले ज्यान गुमाउनेहरूप्रति श्रद्धाञ्जली तथा घाइते र प्रभावितहरूको शीघ्र स्वास्थ्यलाभको कामना गरेका छन्।

उनले नदी, खोला तथा अन्य जोखिमयुक्त क्षेत्र आसपास बसोबास गर्ने नागरिकलाई उच्च सतर्कता अपनाउनसमेत आग्रह गरेका छन्।

Originally published on abcnews.com.np.