काठमाडौं । प्रधानमन्त्री बालेन्द्र शाहले देशले अकल्पनीय विपद्को सामना गरिरहेको भन्दै सरकार यथाशीघ्र उद्धार तथा राहतमा जुटिरहेको बताएका छन्। उनले विपद्को सामना गर्न आम नेपाली, विश्वभर रहेका नेपाली तथा अन्तर्राष्ट्रिय समुदाय एकजुट भएर सहयोग गरिरहेको बताएका हुन्।

सामाजिक सञ्जालमार्फत सरकारले गरिरहेको उद्धार तथा राहत प्रयासबारे जानकारी दिँदै प्रधानमन्त्री शाहले आज बिहान साढे ६ बजेदेखि उद्धारका लागि उडान सुरु भएको बताए। उनका अनुसार अहिलेसम्म १५ भन्दा बढी उडान भइसकेका छन् भने थप हेलिकोप्टर उडानका लागि तयारी अवस्थामा राखिएका छन्।

नेपाली सेनाले सञ्चालन गरेको उद्धार अभियानमार्फत रसुवाको टिमुरेबाट ११६ जनालाई सकुशल उद्धार गरिएको प्रधानमन्त्री शाहले जानकारी दिएका छन्। उद्धार गरिएकामध्ये ९५ जना नेपाली र २१ जना भारतीय नागरिक छन्। यस्तै, टनेलबाट ७ जना नेपाली नागरिकको समेत सफल उद्धार गरिएको उनले बताए।

प्रभावित क्षेत्रमा राहत सामग्री पठाइँदै

प्रधानमन्त्री शाहका अनुसार प्रभावित क्षेत्रमा अत्यावश्यक सामग्रीसहित जेनेरेटर, पोर्टेबल मोबाइल टावर, मेडिकल सामग्री, टेन्ट तथा फलाम–ढुंगा काट्ने मेसिन पठाउने काम भइरहेको छ।

छिट्टै प्रभावित क्षेत्रमा मोबाइल नेटवर्क तथा मोबाइल चार्जिङको अस्थायी व्यवस्था गरिने उनले बताएका छन्। यसबाट सञ्चार सम्पर्क पुनःस्थापित गर्न सहयोग पुग्ने अपेक्षा गरिएको छ।

नुवाकोटमा अस्थायी शिविर तयार गरी खाना तथा पानीको व्यवस्था गरिएको प्रधानमन्त्री शाहले जानकारी दिएका छन्। प्रभावित क्षेत्रको अवस्थाबारे ड्रोन सर्वेक्षणबाट सूचना संकलन गर्ने काम अन्तिम चरणमा पुगेको र यसले उद्धार तथा राहत कार्यलाई थप प्रभावकारी बनाउन सहयोग पुग्ने उनको भनाइ छ।

सिकिस्त, वृद्ध, महिला र बालबालिकालाई प्राथमिकता

प्रधानमन्त्री शाहले हेलिकोप्टरबाट उद्धार गर्दा सुरुमा सिकिस्त, वृद्ध, महिला तथा बालबालिकालाई प्राथमिकता दिइने बताएका छन्।

उनले विपद्को यस कठिन समयमा सबैलाई धैर्य र संयम कायम राख्दै उद्धार तथा राहतको प्रतीक्षा गर्न आग्रह गरेका छन्।

राज्यका सम्पूर्ण संयन्त्र परिचालन गरिएको भन्दै प्रधानमन्त्री शाहले आशा र विश्वासका साथ एकजुट भएर विपद्को सामना गर्नुपर्ने बताएका छन्। साथै, उद्धार तथा राहत अभियानमा हातेमालो गर्ने सबैप्रति उनले धन्यवाद व्यक्त गरेका छन्।

Originally published on abcnews.com.np.