काठमाडौं । भोटेकोसीको विनाशकारी बाढीमा परेर पाँच वटा जलविद्युत् आयोजनामा कार्यरत करिब २०० जना सम्पर्कविहीन भएका छन्। रसुवा, नुवाकोट लगायतका जिल्लामा बुधबार आएको बाढीले विद्युत् परियोजनामा ठूलो जनधनको क्षति पुर्याएको आशंका गरिएको छ। पछिल्लो विवरणअनुसार करिब २०० जना मानिस सम्पर्कविहीन भएका हुन्।

स्वतन्त्र ऊर्जा उत्पादकहरूको संस्था नेपाल (इप्पान)ले उपलब्ध गराएको तथ्यांक अनुसार रसुवामा निर्माणाधीन २१६ मेगावाटको माथिल्लो त्रिशूली–१ जलविद्युत आयोजनामा काम गर्ने एन्ड्रिज हाइड्रोका ७६ जना सम्पर्कविहीन भएका छन्। ती मध्ये आधा नेपाली र आधा विदेशी नागरिक रहेको बताइएको छ। नेपाल वाटर एण्ड इनर्जी डेभलपमेन्ट कम्पनीका ११ जना पनि सम्पर्कविहीन छन्, जसमा ८ जना कोरियन नागरिक समावेश छन्।

आयोजनाको परामर्शदाता जेड कन्सल्ट र लामा जेभियर्स जेभीका ७ जनासमेत सम्पर्कविहीन भएको इप्पानले जनाएको छ। आयोजनामा कार्यरत १२ जना हेडवर्क्र्स क्षेत्रमा र २०० भन्दा बढी विद्युतगृह (पावर हाउस) क्षेत्रमा उद्दारको पर्खाइमा रहेको जानकारी प्राप्त भएको छ। आयोजनास्थलबाट पहिलो चरणको उद्दार सुरु भएको अनौपचारिक रूपमा बताइएको छ।

त्यसैगरी, १११ मेगावाट क्षमताको रसुवागढी आयोजनामा कार्यरत ५१ जना सम्पर्कविहीन छन्। टिमुरेमा ३ जनाले अग्लो ठाउँमा उक्लिएर ज्यान जोगाएका तर कसैसँग पनि सञ्चार सम्पर्क हुन सकेको छैन। यस्तै, ५ मेगावाट क्षमताको मैलुङ खोला आयोजनाको विद्युत गृहमा कार्यरत ८ जना कर्मचारी बुधबारदेखी नै सम्पर्कविहीन छन्। इप्पानका अनुसार हेलिकप्टर व्यवस्थापन गरेर उद्दार तथा अवलोकनमा जाने प्रयास भइरहेको छ।

१२० मेगावाट क्षमताको रसुवा भोटेकोसीमा सिभिल कन्ट्र्याक्टर सिनो हाइड्रोका दुईजना हराइरहेका छन्, पाँच जना नजिकैको गाउँमा शरण लिएर बसेका छन्। जसमा ३ जना चिनियाँ र २ जना नेपाली उद्दारको पर्खाइमा रहेका छन्। हेलिकप्टर पुर्याएर उद्दारमा जाने तयारी भइरहेको इप्पानले जनाएको छ।

त्यसैगरी, २० मेगावाटको लाङटाङ खोलामा आएको बाढीले सुरुङमा थुनिएर सम्पर्कविहीन भएका ६० जना (२५ जना कर्मचारी र ३५ जना कामदार)सँग पनि सम्पर्क स्थापित हुन सकेको छैन। अहिलेसम्म सबैको अवस्था अज्ञात नै रहेको छ। विकासकर्ता कम्पनीका प्रतिनीधि गएर उद्धारका लागि प्रयास भइरहेपनि हेलिकप्टरको व्यवस्था हुन नसकेको इप्पानले जानकारी दिएको छ।

Originally published on abcnews.com.np.