काठमाडौं । भोटेकोसी बाढीपीडितको उद्धार तथा राहतका लागि प्रधानमन्त्री राहत कोषमा एकै दिन २७ करोड ३३ लाख रुपैयाँभन्दा बढी सहयोग जम्मा भएको छ।

अर्थमन्त्रीको सचिवालयका अनुसार बिहीबार विभिन्न बैंक तथा निजी क्षेत्रका कम्पनीहरूले राहत कोषमा उक्त रकम जम्मा गरेका हुन्।

सहयोग गर्ने संस्थामध्ये गोर्खा ब्रुअरीले १० करोड रुपैयाँ, कुमारी बैंकले ३ करोड, राष्ट्रिय वाणिज्य बैंकले ३ करोड, नेपाल बैंकले ३ करोड १ लाख, एनआईसी एसिया बैंकले २ करोड २१ लाख, पूर्वाधार विकास बैंक (निफ्रा)ले २ करोड ५० लाख र सारस बेभरेज (रेडबुल)ले २ करोड रुपैयाँ सहयोग गरेका छन्।

यस्तै, एनसेल आजिआटाले १ करोड, शिवशक्ति ग्रुपले २१ लाख तथा रिलायन्स सुगर एन्ड केमिकल इन्डस्ट्रिजले १० लाख रुपैयाँ सहयोग गरेका छन्।

सरकारले बाढी प्रभावितको खोज, उद्धार, राहत तथा पुनःस्थापनाका लागि प्राप्त सहयोग परिचालन गर्ने जनाएको छ।

Originally published on abcnews.com.np.