रसुवा बाढीपीडितका लागि कोशी प्रदेशका उद्योगी राउतले दिए ११ लाख

विराटनगर । रसुवामा गएको विनाशकारी बाढी तथा पहिरोबाट प्रभावित नागरिकको उद्धार तथा राहतका लागि नेपाल उद्योग वाणिज्य महासंघ, कोशी प्रदेशका अध्यक्ष राजेन्द्र राउतले व्यक्तिगत रूपमा ११ लाख रुपैयाँ सहयोग गरेका छन्। महासंघ, कोशी प्रदेशले बिहीबार जारी गरेको विज्ञप्तिमार्फत राउतले प्रधानमन्त्री राहत कोषमा ११ लाख रुपैयाँ जम्मा गरेको जनाएको हो।महासंघले बाढी तथा पहिरोबाट भएको ठूलो जनधनको क्षतिप्रति दुःख व्यक्त गर्दै मृतकप्रति श्रद्धाञ्जली तथा शोकसन्तप्त परिवारमा समवेदना प्रकट गरेको छ। साथै, घाइतेहरूको शीघ्र स्वास्थ्यलाभको कामना गरेको छ।महासंघले बेपत्ताको खोजी कार्यलाई तीव्र बनाउन, घाइतेको निःशुल्क तथा प्रभावकारी उपचारको व्यवस्था गर्न र घरबारविहीन परिवारलाई तत्काल सुरक्षित आवास, खाद्यान्न तथा राहत सामग्री उपलब्ध गराउन सरकारसँग आग्रह गरेको छ।

त्यस्तै, कोशी प्रदेशका उद्योगी–व्यवसायी तथा उद्योग वाणिज्य संघ–संस्थालाई पनि आफ्नो क्षमताअनुसार राहत तथा सहयोग उपलब्ध गराउन महासंघले अपिल गरेको छ। प्राकृतिक विपद्को समयमा उद्धार, राहत र पुनःस्थापनामा निजी क्षेत्रले सामाजिक उत्तरदायित्वअनुसार सहयोग गर्नुपर्ने महासंघको भनाइ छ।