काठमाडौं । रसुवाको भोटेकोशी नदीमा आएको विनाशकारी बाढीबाट प्रभावित विभिन्न जिल्लामा हालसम्म ५३८ जनाको शव फेला परेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले शुक्रबार दिउँसो ३ बजेसम्मको खोज, उद्धार तथा राहतसम्बन्धी विवरण सार्वजनिक गर्दै उक्त जानकारी दिएको हो।

प्राधिकरणका अनुसार फेला परेका शवमध्ये सबैभन्दा धेरै नवलपरासी (पूर्व)मा १३४ जनाको शव भेटिएको छ। चितवनमा १२१ जनाको शव फेला परेको छ।

यस्तै गोरखामा ४६, नुवाकोटमा ३७, धादिङमा ३३, तनहुँमा २८, नवलपरासी (पश्चिम)मा २७ र रसुवामा १२ जनाको शव फेला परेको प्राधिकरणले जनाएको छ।

गोरखामा फेला परेका मृतकको विवरणमा विभिन्न मानव अङ्गसमेत समावेश गरिएको प्राधिकरणले स्पष्ट पारेको छ।

प्राधिकरणका प्रवक्ता शान्ति महतका अनुसार बाढीपछि हालसम्म ९७७ जना सम्पर्कविहीन रहेका छन्। सम्पर्कविहीन हुनेमा नेपाल प्रहरीका २८ जना, नेपाली सेनाका ४५ जना, सशस्त्र प्रहरी बल नेपालका १३ जना, भन्सार कार्यालयका १५ जना तथा अध्यागमन कार्यालयका चार जना रहेका छन्।

त्यस्तै रसुवाबाट १६१ जना र नुवाकोटबाट एक जना सम्पर्कविहीन रहेको विवरण प्राप्त भएको छ। मकवानपुरबाट ६६ जना तथा ५१७ जना विदेशी नागरिक पनि सम्पर्कविहीन रहेको प्राधिकरणले जनाएको छ।

नेपाल घुम्न आएका तथा विदेशमा बसोबास गर्ने १२७ जना नेपालीसमेत सम्पर्कविहीन रहेको विवरणमा उल्लेख छ।

बाढीबाट हालसम्म ७३ जना घाइते भएका छन्। घाइतेमध्ये रसुवाका ४३ जना, नुवाकोटका २७ जना र धादिङका तीन जना रहेका छन्।

प्राधिकरणले बाढी प्रभावित क्षेत्रमा खोज तथा उद्धार कार्य जारी रहेको जनाएको छ। नदीका विभिन्न तटीय क्षेत्र तथा तल्लो भूभागमा शव तथा सम्पर्कविहीन व्यक्तिको खोजीका लागि सुरक्षा निकाय र सम्बन्धित टोली परिचालन गरिएको छ।

Originally published on abcnews.com.np.