काठमाडौं । स्पेनिस फुटबल क्लब बार्सिलोना र एथ्लेटिक क्लबले नेपालमा आएको विनाशकारी बाढीप्रति ऐक्यबद्धता जनाउँदै प्रभावित नेपाली नागरिक तथा ज्यान गुमाएकाप्रति श्रद्धाञ्जली अर्पण गरेका छन्।

क्लबका खेलाडी, प्रशिक्षक तथा कर्मचारीहरूले बार्सिलोनाको घरेलु मैदान क्याम्प नोउमा भएको खेलअघि नेपालका लागि प्रार्थना गर्दै एक मिनेट मौनधारण गरेका हुन्। दुवै टोलीले कठिन परिस्थितिबाट गुज्रिरहेका नेपाली जनताप्रति साथ र समर्थन व्यक्त गरेका छन्।

उक्त खेलमा बार्सिलोना २–० गोलले विजयी भएको थियो। खेलको ३७औँ मिनेटमा राफिन्हाले गोल गर्दै टोलीलाई अग्रता दिलाएका थिए भने ८२औँ मिनेटमा फेर्मिन लोपेजले दोस्रो गोल गरेका थिए।

यसअघि स्पेनकै अर्को प्रतिष्ठित क्लब एट्लेटिको मड्रिडले पनि नेपालमा बाढीबाट ज्यान गुमाएकाप्रति श्रद्धाञ्जली व्यक्त गर्दै प्रभावित नेपाली जनताप्रति ऐक्यबद्धता जनाएको थियो।

Originally published on abcnews.com.np.