काठमाडौं । सुनको भाउ आज पनि घटेको छ। नेपाल सुनचाँदी व्यवसायी महासंघका अनुसार सुनको मूल्य तोलामा २ हजार ४ सय रुपैयाँ घटेर ३ लाख ६ हजार ६ सय रुपैयाँमा झरेको छ। हिजो मात्रै सुनको भाउ तोलामा ९ हजार ५ सय रुपैयाँ घटेर ३ लाख ९ हजार रुपैयाँमा झरेको थियो। यसअघि शुक्रबार सुनको मूल्य तोलामा २ हजार ४ रुपैयाँ तथा बिहीबार १ हजार २ सय रुपैयाँ घटेको थियो। आजको गिरावटसँगै चार दिनमा सुनको भाउ तोलामा १५ हजार ५ सय रुपैयाँले घटेको छ। यता, चाँदीको मूल्य भने आज स्थिर रहेको छ। हिजो तोलामा १ सय ८५ रुपैयाँ घटेर ४ हजार ७ सय ८० रुपैयाँमा झरेको चाँदीको मूल्य आज सोही दरमा कायम रहेको महासंघले जनाएको छ। गत माघ १५ गते सुनको मूल्य तोलामा २० हजार ५ सय रुपैयाँले बढेर ३ लाख ३९ हजार ३ सय रुपैयाँ पुगेको थियो। यो नेपाली बजारमा सुनको हालसम्मकै उच्च मूल्य हो। त्यस्तै, गत माघ १५ गते चाँदीको मूल्य पनि ७ हजार ५ सय ५ रुपैयाँ प्रतितोला पुगेको थियो, जुन हालसम्मकै उच्च मूल्य हो। गत माघ १८ गते चाँदीको मूल्यमा आएको १ हजार ५ सय ६५ रुपैयाँको गिरावट भने हालसम्मकै ठूलो एकदिने गिरावट रहेको महासंघले जनाएको छ।

Originally published on abcnews.com.np.