काठमाडौं । नेकपा (एमाले) संसदीय दलका नेता रामबहादुर थापा ‘बादल’ले भोटेकोसी नदीमा आएको बाढीमा परी ज्यान गुमाउनेहरूप्रति श्रद्धाञ्जली व्यक्त गर्दै शोकसन्तप्त परिवारजनमा समवेदना प्रकट गरेका छन्।

बुधबार प्रतिनिधिसभा बैठकमा एमालेका तर्फबाट धारणा राख्दै नेता बादलले बाढीमा घाइते भएकाहरूको शीघ्र स्वास्थ्यलाभको कामना गरे। उनले विपद्को शोकको घडीमा भोटेकोसी बाढीको समुचित समीक्षा गरी आगामी दिनमा यस्ता घटनाबाट हुने क्षति न्यूनीकरणका लागि सचेत हुनुपर्ने बताए।

विज्ञहरूको भनाइ उद्धृत गर्दै बादलले जलवायु परिवर्तनका कारण हिउँ पग्लिएर हिमताल बनेको र हिमताल फुट्दा भोटेकोसीमा ठूलो बाढी आएको बताए। उनले हिमालय क्षेत्रमा जलवायु परिवर्तनको बढ्दो प्रभावबारे विश्व समुदायको ध्यानाकर्षण गराउनुपर्नेमा जोड दिए।

वन विनाशले समेत जलवायु परिवर्तनमा भूमिका खेलिरहेको उल्लेख गर्दै उनले नेपालले हरेक वर्ष बाढी तथा पहिरोबाट हुने विनाश व्यहोर्नुपर्ने अवस्था दुःखद भएको बताए।

नेता बादलले प्रधानमन्त्री संसद्प्रति उत्तरदायी हुनुपर्ने भन्दै सरकारका गतिविधिबारे नियमित रूपमा संसद्लाई जानकारी गराउन आग्रह गरे।

उनले बाढीबाट भएको क्षतिको पुनःस्थापना तथा भविष्यमा विपद् व्यवस्थापनका लागि अन्तर्राष्ट्रिय सहयोग र क्षतिपूर्ति जुटाउन परराष्ट्रमन्त्रीको नेतृत्वमा विशेष कार्यदल गठन गर्नुपर्ने सुझावसमेत दिए।

Originally published on abcnews.com.np.