काठमाडौं । नेपाली कांग्रेसको संस्थापनइतर पक्षले पार्टीको १५औँ केन्द्रीय महाधिवेशन छुट्टै आयोजना गर्ने निर्णय गरेको छ । शशांक कोइराला नेतृत्वको संस्थापनइतर समूहले आगामी मंसिर २१ देखि २३ गतेसम्म काठमाडौंमा महाधिवेशन गर्ने निर्णय गरेको हो ।

कांग्रेस संस्थापन पक्षले यसअघि नै भदौ २४ गतेदेखि वडा अधिवेशन सुरु गरी असोज १९ गतेसम्म १५औँ महाधिवेशन सम्पन्न गर्ने कार्यतालिकासार्वजनिक गरिसकेको छ । त्यसको समानान्तर रूपमा संस्थापनइतर पक्षले आफ्नो छुट्टै महाधिवेशनको कार्यतालिका तय गरेको हो ।

चुनदेवीस्थित सम्पर्क कार्यालयमा भदौ १७ गतेदेखि बसेको बैठकले महाधिवेशनको मिति र कार्यतालिका तय गरेको हो । बैठक महाधिवेशन तयारी समितिका संयोजक डा. शशांक कोइरालाको संयोजकत्वमा बसेको थियो ।

यस्तो छ संस्थापनइतर पक्षको कार्यतालिका

संस्थापनइतर समूहले सार्वजनिक गरेको कार्यतालिकाअनुसार असोज १५ गते वडा अधिवेशन हुनेछ ।

त्यसपछि:

• असोज २० गते — पालिका अधिवेशन
• असोज २३ गते — प्रदेशसभा तथा प्रतिनिधिसभा क्षेत्रीय अधिवेशन
• कात्तिक १५ गते — जिल्ला अधिवेशन
• मंसिर ४ गते — प्रदेश अधिवेशन
• मंसिर २१–२३ गते — १५औँ केन्द्रीय महाधिवेशन

भोटेकोसी बाढीबाट प्रभावित रसुवा, नुवाकोट र धादिङ जिल्लाको अधिवेशन कार्यतालिका भने पछि सार्वजनिक गरिने तयारी समितिले जनाएको छ ।

निर्वाचनदेखि भ्रातृ संस्थासम्मको जिम्मेवारी कोइरालालाई

महाधिवेशन सम्पन्न गर्न आवश्यक केन्द्रीय निर्वाचन समिति, क्रियाशील सदस्य छानबिन तथा व्यवस्थापन समिति, विधान संशोधन समिति र अनुशासन समिति गठन गर्ने जिम्मेवारी संयोजक कोइरालालाई दिइएको छ ।

त्यस्तै, नेपाल विद्यार्थी संघ, नेपाल तरुण दल, नेपाल दलित संघ, आदिवासी जनजाति महासंघ, नेपाल सांस्कृतिक महासंघलगायत भ्रातृ तथा शुभेच्छुक संस्थाका तदर्थ समिति गठन गर्ने जिम्मेवारी पनि कोइरालालाई नै दिइएको छ ।

असोज ९ गतेभित्र क्रियाशील सदस्यता टुंग्याउने

संस्थापनइतर पक्षले असोज ९ गतेभित्र नयाँ क्रियाशील सदस्यताको प्रक्रिया टुंग्याउने निर्णय गरेको छ ।

१४औँ महाधिवेशनमा सहभागी भएका, २०८२ पुस १० गतेभित्र सदस्यता नवीकरण गरेका तथा नयाँ सदस्यताका लागि फारम भरेका सदस्यले १५औँ महाधिवेशनमा सहभागी हुन पाउने जनाइएको छ ।

क्रियाशील सदस्यतासम्बन्धी विवाद उत्पन्न भएमा छानबिन तथा व्यवस्थापन समितिको निर्णय अन्तिम हुने बताइएको छ ।

महाधिवेशनका लागि केन्द्रीय निर्वाचन समितिले सातै प्रदेश, ७७ जिल्ला, प्रतिनिधिसभा तथा प्रदेशसभा निर्वाचन क्षेत्र, पालिका र वडा तहसम्म निर्वाचन तथा मतदान अधिकृत खटाउने तयारी गरेको छ ।

यससँगै प्रदेशसभा तथा स्थानीय तहका विभिन्न पदमा उम्मेदवार बन्न इच्छुकहरूको नामावली संकलन तथा छनोट प्रक्रिया अघि बढाउने निर्णयसमेत गरिएको छ ।

भक्तपुरमा बीपी जयन्ती मनाउने

संस्थापनइतर पक्षले आगामी भदौ २४ गते ११३औँ बीपी जयन्ती भक्तपुरमा मनाउने भएको छ ।

कांग्रेस भक्तपुर जिल्ला सभापति दुर्लभ थापाको अध्यक्षतामा व्यवस्थापन समिति गठन गरी कार्यक्रम सञ्चालन गरिने जनाइएको छ ।

महाधिवेशन तयारी समितिको अर्को बैठक भदौ २६ गते शुक्रबार दिउँसो १ बजे चुनदेवीमा बस्ने सचिवालय समन्वय समिति संयोजक दीपकप्रसाद कुँइकेलले जानकारी दिएका छन् ।

Originally published on abcnews.com.np.