बागलुङ । बागलुङको ढोरपाटनकी युवा भलिबल खेलाडी मिना सुनारले प्रतिष्ठित ‘पल्सर स्पोर्ट्स अवार्ड’अन्तर्गत ‘पिपुल्स च्वाइस अवार्ड’ जितेकी छन् । दर्शक तथा खेलप्रेमीबाट प्राप्त मतका आधारमा प्रदान गरिने उक्त अवार्डमा सुनारले अन्य चार प्रतिस्पर्धीलाई पछि पार्दै उपाधि हात पारेकी हुन् ।

‘पिपुल्स च्वाइस अवार्ड’का लागि सुनारसँगै फुटबलकी पूजा राना, करातेकी सानुमाया थिङ, क्रिकेटका शेर मल्ल र मिक्स मार्सल आर्ट्सका रविन्द्र ढाँट मनोनयनमा परेका थिए । दर्शक तथा खेलप्रेमीको मतमा सबैभन्दा अगाडि रहँदै सुनारले अवार्ड आफ्नो नाममा पार्न सफल भएकी हुन् ।

गाउँको कोर्टदेखि राष्ट्रिय पहिचानसम्म

ढोरपाटन नगरपालिका–२, बुर्तिबाङकी मिना सानै उमेरदेखि भलिबलप्रति आकर्षित थिइन् । बागलुङका ग्रामीण क्षेत्रमा भलिबल खेल्दै सुरु भएको उनको यात्रा अहिले राष्ट्रिय टोली र अन्तर्राष्ट्रिय प्रतियोगिताको तयारीसम्म पुगेको छ ।

निरन्तरको मेहनत, अनुशासन र उत्कृष्ट प्रदर्शनका कारण उनले नेपाली भलिबलमा आफ्नो छुट्टै पहिचान बनाउन सफल भएकी हुन् ।

उनको खेल कौशल, मेहनत र भविष्यको सम्भावनालाई मूल्याङ्कन गर्दै ‘पिपुल्स च्वाइस अवार्ड’का लागि मनोनयन गरिएको थियो । अन्ततः ठूलो संख्यामा रहेका खेलप्रेमीको मत आफ्नो पक्षमा पार्दै उनले प्रतिष्ठित अवार्ड जितिन् ।

एसियाली खेलकुदका लागि पनि छनोट

मिनाको प्रदर्शन र सम्भावनालाई ध्यानमा राख्दै उनलाई जापानमा आयोजना हुने २०औँ एसियाली खेलकुदका लागि नेपाली भलिबल टोलीमा समेत छनोट गरिएको छ ।

ग्रामीण क्षेत्रबाट भलिबलको यात्रा सुरु गरेकी मिना अब एसियाली खेलकुदजस्तो ठूलो अन्तर्राष्ट्रिय मञ्चका लागि तयारी गरिरहेकी छन् ।

पढाइसँगै खेलकुद

मिना हाल कक्षा १२ मा अध्ययनरत छिन् । अध्ययन र खेलकुदलाई सँगसँगै अघि बढाइरहेकी उनले आगामी दिनमा नेपाली राष्ट्रिय टोलीमा आफ्नो स्थान अझ बलियो बनाउने लक्ष्य राखेकी छन् ।

अन्तर्राष्ट्रिय प्रतियोगितामा नेपालका लागि उत्कृष्ट प्रदर्शन गर्ने उनको सपना छ ।

ढोरपाटनको ग्रामीण परिवेशबाट उदाएकी मिनाले पाएको यो सफलता व्यक्तिगत उपलब्धिमा मात्र सीमित छैन । यसले बागलुङको ग्रामीण भेगमा लुकेका खेल प्रतिभालाई राष्ट्रिय तथा अन्तर्राष्ट्रिय मञ्चसम्म पुग्ने बाटो पनि देखाएको छ ।

सानो ठाउँको कोर्टबाट सुरु भएको उनको यात्रा अहिले देशकै प्रतिष्ठित खेल सम्मानसम्म आइपुगेको छ—र अब उनको नजर अन्तर्राष्ट्रिय पदकतर्फ छ ।

Originally published on abcnews.com.np.