काठमाडौं । इटालीकी प्रधानमन्त्री जर्जिया मेलोनीले दोस्रो विश्वयुद्धपछि इटालीमा सबैभन्दा लामो समय सरकारको नेतृत्व गर्ने कीर्तिमान बनाएकी छन्।

इटालियन समाचार एजेन्सी ‘अन्सा’का अनुसार मेलोनीले शुक्रबार सरकारको नेतृत्व गरेको १ हजार ४१३ दिन पूरा गर्दै यसअघिको रेकर्ड तोडेकी हुन्।

मेलोनीले सन् २०२२ अक्टोबर २२ मा इटालीको प्रधानमन्त्रीका रूपमा पदभार ग्रहण गरेकी थिइन्। यसअघि सन् २००१ जुन ११ देखि २००५ अप्रिल २३ सम्म १ हजार ४१२ दिन सरकारको नेतृत्व गरेका सिल्भियो बर्लुस्कोनीको दोस्रो सरकार सबैभन्दा लामो समय टिकेको सरकार थियो।

मेलोनीले शुक्रबार उक्त रेकर्ड तोडेकी हुन्।

दक्षिणपन्थी प्रभाव रहेको बारी सहरमा शुक्रबार मेलोनीको सरकारको यो उपलब्धिको उत्सव मनाइने भएको छ। ‘इल सोले २४ ओरे’का अनुसार कार्यक्रममा हजारौँ मानिस सहभागी हुने अपेक्षा गरिएको छ।

सम्भावित विरोध प्रदर्शनलाई ध्यानमा राख्दै बारीमा सुरक्षा व्यवस्था पनि कडा पारिएको छ।

मेलोनीको पार्टी **‘ब्रदर्स अफ इटली’**ले उनको झन्डै चार वर्षको कार्यकालका तस्बिर तथा उपलब्धि समेटिएको उत्सवमूलक भिडियोसमेत सार्वजनिक गरेको छ।

भिडियोमा ‘सबैभन्दा स्थिर सरकार, सबैभन्दा बलियो इटाली’ भन्ने नारा राखिएको छ।

Originally published on abcnews.com.np.