काठमाडौं । रसुवास्थित माथिल्लो त्रिशूली–१ जलविद्युत् आयोजनाको सुरुङबाट ११ दिनपछि जीवितै उद्धार गरिएका चिनियाँ नागरिकलाई काठमाडौं ल्याइएको छ।

उद्धार गरिएका उनलाई उपचारका लागि छाउनीस्थित वीरेन्द्र अस्पतालमा लगिएको छ।

प्रधानमन्त्री वालेन्द्र शाह (बालेन)को सचिवालयका अनुसार भदौ १० गते भोटेकोसी नदीमा आएको विनाशकारी बाढीपछि माथिल्लो त्रिशूली–१ को अडिट–४ सुरुङमा फसेका चिनियाँ नागरिकको शनिबार भदौ २० गते जीवितै उद्धार गरिएको हो।

प्रधानमन्त्रीको सचिवालयले सामाजिक सञ्जालमार्फत बाढीका कारण प्रभावित २१६ मेगावाट क्षमताको माथिल्लो त्रिशूली–१ जलविद्युत् आयोजनाको अडिट–४ टनेलबाट एक चिनियाँ नागरिकको उद्धार गरिएको जनाएको छ।

नेपाली सेना र दक्षिण कोरियाली विपद् विज्ञ टोलीले शनिबार दिउँसो सुरुङभित्रबाट उनको उद्धार गरेको थियो।

भोटेकोसी बाढीपछि सुरुङभित्र फसेका उनको ११औँ दिनमा जीवित उद्धार भएको हो। उद्धारपछि प्रारम्भिक स्वास्थ्य परीक्षण तथा उपचारका लागि उनलाई नुवाकोटको त्रिशूलीस्थित सैनिक ब्यारेकमा लगिएको थियो। त्यसपछि थप उपचारका लागि काठमाडौं ल्याइएको हो।

बाढीपछि माथिल्लो त्रिशूली–१ लगायत प्रभावित जलविद्युत् आयोजनाका सुरुङमा फसेका तथा सम्पर्कविहीन व्यक्तिको खोजी तथा उद्धार कार्य जारी छ। पछिल्ला दिनमा सुरुङबाट समेत जीवित उद्धार हुन थालेपछि खोजीमा संलग्न टोली र आफन्तमा आशा थपिएको छ।

Originally published on abcnews.com.np.