काठमाडौं । पृथ्वी राजमार्गअन्तर्गत मुग्लिङ–मलेखु सडकखण्डको कृष्णभीरमा सडक सञ्चालनका लागि थालिएको भित्ता काट्ने काम अन्तिम चरणमा पुगेको छ।

शुक्रबारदेखि निर्माण व्यवसायी, नेपाल जियोटेक सोसाइटीका प्राविधिक, सडक विभागका प्रतिनिधि तथा विज्ञहरूको प्रत्यक्ष निगरानीमा सडक खोल्ने काम भइरहेको हो।

निर्माण व्यवसायी महासंघका उपाध्यक्ष शहदेव खड्काका अनुसार कृष्णभीरको मुग्लिङतर्फ करिब १ सय ५० मिटर क्षेत्रमा स्काभेटर सञ्चालनका लागि ट्रयाक खोलिसकिएको छ। मलेखुतर्फ करिब १ सय मिटर ट्रयाक खुलिसकेको र बाँकी ५० मिटर पनि शनिबार नै खोल्ने तयारी छ।

कामलाई तीव्रता दिन रातिको समयमा समेत प्राविधिक, अपरेटर, इन्जिनियर र कर्मचारी परिचालन गरिएको खड्काले बताए। उनले शनिबार साँझसम्म नागढुंगा–मुग्लिङ सडकखण्ड सञ्चालनमा ल्याउने लक्ष्य रहेको जानकारी दिए।

गत भदौ १० गतेदेखि आएको त्रिशूली नदीको बाढीले कृष्णभीर, परेवाभीरलगायत विभिन्न स्थानमा सडक कटान गरी बगाएपछि पृथ्वी राजमार्ग अवरुद्ध भएको थियो।

राजमार्ग अवरुद्ध हुँदा पश्चिम नेपालबाट काठमाडौं प्रवेश गर्ने सवारीसाधन प्रभावित भएका छन्। साथै, खाद्यान्नलगायत अत्यावश्यक सामग्री काठमाडौं भित्र्याउनसमेत समस्या भइरहेको छ।

सडक सञ्चालनमा आएपछि पश्चिम क्षेत्रबाट काठमाडौं आउने–जाने यातायात तथा अत्यावश्यक सामग्रीको आपूर्ति केही सहज हुने अपेक्षा गरिएको छ।

Originally published on abcnews.com.np.