काठमाडौँ । भूकम्पले क्षतिग्रस्त भएको १ सय ६५ वर्ष पहिले स्थापना भएको मुलुककै जेठो विद्यालय (दरबार हाईस्कुल) भानु माध्यमिक विद्यायलय को पुर्ननिर्माणको काम सुरु भएको छ।
चीन सरकारको सहयोगमा पुनर्निर्माण गर्न लागिएको सो विद्यालयको शुक्रबार एक समारोहका बीच सिलन्यास गरिएको छ ।
नेपाल सरकारका शिक्षा, विज्ञान तथा प्रविधि मन्त्री गिरिराजमणि पोखरेल र नेपालस्थित चिनीया राजदुत यु होङले संयुक्त रुपमा सिलन्यास गरेका हुन् ।
भूकम्पछिको भौतिक संरचना पुर्ननिर्माणका लागि २३ जुलाई २०१५ मा २५ वटा पुर्ननिर्माणका आयोजनामा नेपाल सरकार, अर्थमन्त्रालय र चीन सरकारको बाणिज्य मन्त्रालयबीच भएको सम्झौता अनुसार विद्यालयको पुनर्निर्माण कार्य चीन सरकारले गर्न लागेको हो ।

विद्यालय पुर्ननिर्माण कार्यको सिलन्यास गर्दै मन्त्री पोखरेलले तोकिएकै मिति र निर्धारित डिजाईनमा गुणस्तरीय भौतिक संरचनाको निर्माण हुनेमा आफु विश्वस्त रहेको बताए ।

चीन सरकार आफैले छानेको निर्माण व्यवसायीद्वारा पुनर्निर्माण गर्न लागिएको यो विद्यालयको २० महिनाभित्र निर्माण कार्य सम्पन्न गर्नुपर्ने छ ।