काठमाडौं, १९ असोज । गायिका एवं कलाकार शितल शर्माले बाग्लुङको ढोरपाटनका बाढीपीडितलाई पाँच लाख बराबरको राहत सामाग्री सहयोग गरेकी छिन् ।

बाढी, पहिरोले आफन्त गुमाएका, घरबारविहीन भएका बागलुङको ढोरपाटन नगरपालिका वडा नं. ५, ७, ८ र ९ बोबाङका पीडित परिवारलाई गायिका शर्माले नगद, लत्ता कपडा, खाद्यान्न र जस्तापाता लगायतका राहत सामाग्री सहयोग गरेकी हुन् । पीडित परिवार समक्ष पुगेर उनले राहतका सामाग्रीहरु हस्तान्तरण गरेकी छिन् ।

‘बाढीले धेरै क्षति पु-याएको छ, धेरै जनता सडकमा बस्न बाध्य भएका छन् ।,’ गायिका शर्माले राहत वितरण कार्यक्रममा भनिन् ‘उहाँहरुको यो दुःखमा थोरै भए पनि राहत पुगोस् भन्ने अभिप्रायले देश विदेशबाट आर्थिक संकलन गरेर राहत बाँड्न आएको हुँ ।’ ‘देश विदेशबाट सहयोग गर्नुहुने सबै दाजुभाई दिदी बहिनीहरुलाई हार्दिक धन्यवाद दिन चाहन्छु ।’ उनले भनिन् ।

गत भदौ १७ गते बाग्लुङ जिल्लाको ढोरपाटन नगरपालिका वडा नं ९ स्थित भुजी खोलामा आएको बाढीले कयौं व्यक्तिहरुका घरबार बगाएको थियो भने बाढीका कारण २२ जना व्यक्तिहरुको मृत्यु भएको थियो । उक्त बाढीका कारण अझै १४ जना व्यक्तिहरु बेपत्ता छन् । बाढीले १३१ घरमा क्षति पु-याएको ढोरपाटन नगरपालिकाले जनाएको छ । जसका कारण ८० घर पूर्ण रुपमा ध्वस्त भएका थिए भने ५१ घरमा आंशिक क्षति भएको थियो ।

गायिका एवं कलाकार शर्माले ढोरपाटनमा आएको बाढी पहिरोले जनधनमा क्षति पु-याएपछि विभिन्न संघ संस्था, स्वदेश तथा विदेशमा रहनुभएका नेपाली नागरिकहरुबाट आर्थिक संकलन गरेकी थिईन् ।

यसैबीच नेपाली कांग्रेस क्षेत्र नं २ बागलुङले पनि ढोरपाटन नगरपालिका वडा नं ५, ७, ८ र ९ बोबाङका बाढीपहिरो पीडित परिवारलाई नगद, खाद्यान्न, लत्ताकपडा र जस्तापातासहित राहत सामाग्री वितरण गरेको छ । पहिरोमा परेर बेपत्ता तथा मृत्यु भएका ३६ जनाका आफन्तलाई प्रति परिवार सात हजार रुपैयाँका दरले नगद प्रदान गरेको नेपाली कांग्रेस क्षेत्र नं २ बागलुङका क्षेत्रीय सभापति दोर्ण कुँवरले बताए ।
तीन जना घाइतेलाई जनही पाँच हजार रुपैयाँ प्रदान गरिएको छ । बाढी, पहिरोमा परेर घरबिहीन भएका ७९ घर परिवारलाई घर बनाउन प्रति परिवार दुई दुई बण्डल जस्ता पाता, ३०-३० किलो चामल, पाँच-पाँच किलो चिउरा, एक-एक बक्स चाउचाउ, बिस्कुट, नून, आटा, तेल, चिनीलगायतका खाद्य सामग्री वितरण गरिएको छ । त्यसैगरी, पहिरोले बगाएर क्षति पुगेका विद्यालय र स्वास्थ्य संस्थालाई जस्तापाता वितरण गरिएको कुँवरले जानकारी दिए ।