एजेन्सी । अमेरिकी राष्ट्रपती पदमा निर्वाचित जो बाइडनको जितलाई औपचारिकता प्राप्त भएको छ । इलेक्टरल कलेजका सदस्यहरूले राष्ट्रपतीय चुनावमा जो बाइडनको जित भएको पुष्टि गरेका हुन । राष्ट्रपतिको जितलाई औपचारिकता दिने अन्तिम चरणहरु मध्येको यो एउटा चरण हो।

गत नोभेम्बरमा भएको चुनावमा डेमोक्र्याट उम्मेद्वार बाइडनले ३०६ इलेक्टरल कलेज मत ल्याएका थिए भने रिपब्लिकन उम्मेद्वार डोनल्ड ट्रम्पले २३२ मत ल्याएको विविसीले जनाएको छ ।
अमेरिकी प्रणाली अनुसार, मतदाताहरूले खासमा इलेक्टरलहरूलाई मत दिन्छन् । जसले चुनावपछि राष्ट्रपतिका उम्मेद्वारलाई औपचारिक रूपमा मत दिन्छन्।

यो प्रक्रिया भए पनि राष्ट्रपति ट्रम्पले मत परिणाम स्वीकार गर्ने विश्वास गरिएको छैन।
सामान्यतया इलेक्टरलहरूले खासै ध्यान आकृष्ट गर्दैनन् तर यो वर्ष ट्रम्पको निरन्तर मत परिणाम उल्ट्याउने प्रयासले गर्दा सबै राज्यका मतहरू निकै चर्चामा रहे।

ट्रम्पले कतिपय राज्यमा त मुद्दा पनि हाले । तर ती सबै मुद्दाहरु अदालतले अस्वीकार गरिदिएका छन ।

डेमोक्र्याटहरूको बलियो उपस्थिति रहेको क्यालिफोर्नियामा सोमवार मत दिने अन्तिम राज्य थियो । त्यहाँ ५५ इलेक्टरल मत छ। त्यहीँको मतले बाइडनलाई राष्ट्रपति जित्न आवश्यक पर्ने २७० को सीमा पार गराएको थियो।

मिचिगन र जर्जिया जस्ता केही राज्यहरूमा मतदानअघि सुरक्षा व्यवस्था कडा पारिएको थियो।
मतदान प्रक्रियाको परिणाम अब वासिङ्टन डिसी पठाइनेछ । त्यहाँ ६ जनवरीमा कङ्ग्रेसमा उपराष्ट्रपति माइक पेन्सको अध्यक्षतामा हुने संयुक्त सत्रमा औपचारिक रुपमा इलेक्टरल मतहरुको गणना गरिन्छ।

त्यसले जनवरी २० मा राष्ट्रपतिको रूपमा शपथ लिन जो बाइडनलाई बाटो खोल्नेछ ।
इलेक्टरलहरूले मत दिएपछि जो बाइडनले राष्ट्रका नाममा सम्बोधन गर्ने योजना रहेको उनको सङ्क्रमणकालीन टोलीले जनाएको छ ।