काठमाडौँ, २३ माघ । ह्यारी केनको निर्णायक गोलमा टोटनहम हटस्परले इंग्लिस प्रिमियर लिगमा म्यान्चेस्टर सिटीलाई हराएको छ ।

टोटनहमले घरेलु मैदान टोटनहम हटस्पर स्टेडियममा सिटीमाथि १–० को जित निकालेको हो । आइतबार राति भएको खेलको १५औँ मिनेटमा केनले गोल गर्दै घरेलु टोलीलाई अग्रता दिलाएका थिए ।

योसँगै केन टोटनहमका लागि इतिहासकै सबैभन्दा बढी गो गर्ने खेलाडी भएका छन् । इंग्ल्यान्डका कप्तानसमेत रहेका केनले टोटनहमका लागि २६७ गोल गर्दै सर्वाधिक गोलकर्ताको कीर्तिमान बनाएका हुन् । यसअघि सर्वाधिक गोलको कीर्तिमान जिम्मी ग्रेभ्सको नाममा थियो ।

२९ वर्षीय केनले क्लबका लागि पहिलो गोल सन् २०१९ डिसेम्बरमा गरेका थिए ।

उक्त अग्रता कायम राख्दै हटस्परले महत्वपूर्ण तीन अंक जोडेको छ । जितसँगै २२ खेलबाट ३९ अंक जोडेको टोटनहम पाँचौँ स्थानमा छ । यता पराजित सिटीले शीर्ष स्थानको आर्सनलसँगको दुरी छोट्याउने मौका गुमायो ।

एक खेल कम खेलेको सिटीले ४५ अंक जोड्दै दोस्रो स्थानमा छ । समान खेलबाट आर्सनलको ५० अंक छ । आर्सनल अझै ५ अंकले अघि छ ।