काठमाडौं, १६ माघ । राष्ट्रिय युवा सेवा कोषले यस वर्षको ‘नारायणगोपाल युवा संगीत’ पुरस्कार उदयपुरका मनोजराज शिवाकोटी र कास्कीकी इतु जोजिजुलाई संयुक्त रुपमा प्रदान गरेको छ ।

मंगलबार काठमाडौमा कोषले आयोजना गरेको कार्यक्रममा उपप्रधान एवं उर्जामन्त्री कमल थापाले पुरस्कार प्रदान गर्नुभएको हो । उक्त पुरस्कारको राशि रु ५० हजार रहेको छ । त्यसैगरी राष्ट्रिय विभूति अरनिकोको स्मृतिमा कोषले स्थापना गरेको ‘अरनिको युवा कला पुरस्कार’ कास्कीका नगेन सिंह ठकुरी र इलामका विष्णुप्रसाद श्रेष्ठलाई संयुक्त रुपमा प्रदान गरिएको छ ।

उक्त पुरस्कारको राशि पनि रु ५० हजार रहेको छ । चालीस वर्ष ननाघेका युवा कलाकारलाई कोषले वर्षेनी नगद र स्वर्णपदकसहित ती दुवै पुरस्कार प्रदान गर्दै आएको छ । ‘नारायणगोपाल युवा संगीत’ पुरस्कारबाट हालसम्म ४३ जना र ‘अरनिको युवा कला पुरस्कारबाट हालसम्म ३८ जना कलाकारहरु पुरस्कृत भईसकेका छन् ।