म बाहुन हुन चाहान्न
मान्छे हुन चाहान्छु।
म आइमाइ पनि हुन चाहान्न
मान्छेनै हुन चाहान्छु।
चुच्चो नाक र बाहुन जातले मेरा
सुविधाहरु काटिंदै जांदा
मलाई मेरो जात प्रतिनै
घृणा जाग्न थाल्यो।
आइमाई भनेर प्रतिस्पर्धा नगरी
राहत कोटा फालिदिंदा नढांटी भन्दा
सांच्चै मेरो स्वाभिमान फाट्न थाल्यो।
म नर्तकी हैन नांच्नै नजाने पनि
मलाई नाचको उपाधि दिइयोस
म गनिका हैन बिचबाटोमै
मुल्य तोकेर हुर्मत लिइयोस।
मलाई मान्छे बन्नुछ बाहुन हैन
मलाई मान्छे बन्नुछ आइमाइ हैन।
म मान्छे बन्न जे गर्न पनि तयार छु
मान्छे बन्न सक्ने नियम बनाइयोस।
स्वाभिमान बेचेर सुख प्राप्त गर्न हैन
गल्ती भए बरु एसिड खनाइयोस।
अनेक उपाधी भिराएर फुरुक्क पार्दै
जातभातका कुरा नगरियोस।
आइमाई बिचरा कठै भनेर
मेरो कानमा बिष नभरियोस
सांच्चै म कथाकथित उचो
जात र लिङ्ग छोडेर
मात्र मान्छे बन्न चाहान्छु।