बेलायत । तमुधिँ युकेले आयोजना गर्दै आएको नेपाली मेलाको तयारी पूरा भएको छ । १४औं नेपाली मेला अगष्ट २७ तारिख आइतबारका दिन केम्प्टन पार्कमा आयोजना हुँदैछ ।

मेलाको तयारीबारे जानकारी दिन आयोजित पत्रकार सम्मेलनमा मेलाका संयोजक परशु गुरुङले मेलाको सम्पूर्ण तयारी भएको जानकारी दिए । उनले भने, ‘बिबिध कार्यक्रमहरुको साथमा आयोजना गर्न हामी तयार भईसकेको कुराको यहाँहरु सम्पूर्णलाई सहर्ष जानकारी गराउँन चाहन्छौं ।’

नेपालबाट हजारौं माइलको दूरीमा रहेतापनि आफ्नो भाषा, भेषभूषा, धर्म, संस्कृति, परम्परा र रीतिरिवाजलाई जीवन्त राख्ने उद्देश्यले तमुधिँ युकेले बेलायती भूमिमा स्थापित बिभिन्न संघसंस्था समुदायहरुहरुको सहकार्य हौसला, साथ र सहयोगले नेपाली मेला जस्तो बिशाल कार्यक्रमको आयोजना गर्न सक्षम भएका छन् ।

मेलाको तयारीबारे जानकारी दिँदै संयोजक परशु गुरुङले भने, ‘एकातिर यस कार्यक्रमको आयोजनाले नेपाली समुदाय, संघ संस्थाहरु बीचको सम्बन्ध प्रगाढ बनाउन महत्वपूर्ण भूमिका खेलेको छ भने अर्कोतिर यहाँका स्थानिय बासी समक्ष हाम्रो नेपाली कला र संस्कृति प्रस्तुत गर्ने एक थलो बनेको छ । अर्को महत्वपूर्ण कुरा भनेको यो कार्यक्रमको नयाँ पुस्ताहरुलाई नेपाली भाषा, कला र संस्कृतिलाई हस्तान्तरण गराउने एक माध्यम पनि हो र बिस्तारै आफ्नो परम्परालाई जीबन्त राख्न सकोस भन्ने उद्देश्यले पनि यो कार्यक्रमको आयोजना गरिएको हो ।’

यस वर्ष युवा आकर्षण बढाउन मेला आयोजकले विशेष कार्यक्रम अघि सारेको छ । युवाहरुलाई प्रस्तुतिका लागि समय व्यवस्थापन गरिएको र पुरस्कार तथा मेडलको समेत व्यवस्था गरिएको जनाएको छ ।

मेलाको विशेष आकर्षण भनेको झाँकी हो । झाँकीमा सहभागी हुने संस्थाहरुका लागि पुरस्कारको व्यवस्था गरेको छ । मेलामा ३२ संघसंस्था र समुदायको झाँकीको सहभागिता रहने छन् ।

मेलामा १० हजारको उपस्थिति रहने अनुमान गरिएको छ । त्यस्तैगरी मेलामा रेष्टुरेण्ट, उद्यमी र ब्यापारीहरु गरी ३७ वटा स्टलहरु दर्ता भइसकेको संयोजक गुरुङले जानकारी दिए ।