काठमाडौं,२४ भदौ । चलचित्र ‘एक भगवत गीता’ को नाममाथि उत्पन्न विवादलाई लिएर आज चलचित्र विकास बोर्डले निर्णायक छलफल बोलाएको छ । आजै सेन्सरका लागि सिफारिस दिइने पनि विकास बोर्ड स्रोतले बतायो ।

विकास बोर्डले चलचित्रको सेन्सर रोकेको भनेर गलत प्रचार गरिएको स्रोतको भनाइ छ ।

‘खासमा विकास बोर्डले रोक्नै मिल्दैन र रोकेको पनि होइन,’ स्रोतले भन्यो, ‘हामीले शुक्रवारै सिफारिस दिने भनेका थियौँ, तर निर्माण पक्षले नाम थप परिमार्जन गरी धार्मिक समूहहरूलाई पनि सहमतिमा ल्याएर आइतबार लिने भनेपछि रोकिएको हो ।’

यसैबीच, चलचित्रकी निर्देशक झरना थापाले हिजो मध्यरातमा फेसबुकमा पीडादायी स्टाटस लेखिन् । उनले चलचित्रबाट श्रीमदभागवत गीताको अवहेलना नभएको प्रष्ट पार्दा पनि सेन्सर सिफारिस नदिइएको बताएकी छन् ।

तर, स्रोतले भने बोर्डलाई आरोप लगाएर निर्देशक थापाले भावनात्मक समर्थन हासिल गर्न खोजेको टिप्पणी गर्‍यो । ‘शुक्रवार उहाँहरूले नै सिफारिस लिन चाहनुभएन । आज सिफारिस पाउनुअघि स्टाटस लेखेर बोर्डलाई दोषारोपण गर्न खोज्नुभयो,’ स्रोतले भन्यो ।

आज बोर्डले चलचित्रको नाममाथि आपत्ति जनाएका धार्मिक संघ–संस्थाहरूलाई निर्णायक छलफलका लागि बोलाएको हो । नाममाथि सहमति जुटे पनि नजुटे पनि बोर्डले सिफारिस नरोक्ने स्रोतको भनाइ छ ।

‘सम्भवतः आज सहमति जुट्छ होला, जुटेन भने पनि बोर्डका तर्फबाट पत्रकार सम्मेलनमार्फत आफ्नो प्रष्टीकरणसहित सेन्सर सिफारिस दिइन्छ,’ स्रोतले भन्यो ।

आजको छलफलमा बोर्डका पदाधिकारी, धार्मिक समूहहरूको प्रतिनिधि, निर्माता संघका प्रतिनिधि र चलचित्र निर्माण पक्ष सहभागी छ ।

हिन्दूहरुको महान् ग्रन्थको नाममा दुरुपयोग गरिएको भन्दै धार्मिक समूहहरूले विकास बोर्डमा निवेदन दिएका थिए ।

निर्माण पक्षले भने फिल्मले श्रीमदभागवत गीतालाई अवहेलना नगरेको र फिल्मको कथावस्तु धार्मिक नभएको प्रष्टीकरण दिइरहेको छ । फिल्म रिलिज हुने संघारमा सेन्सर रोकिएपछि निर्माण पक्ष छटपटीमा परेका हुन् ।