काठमाडौं, २० फागुन,। साहित्यकार एवं नेकपा (माओवादी केन्द्र)का वरिष्ठ नेता दीनानाथ शर्माद्वारा लिखित ‘बाह्रखरीको बोटमुनी’ निबन्ध संग्रह विमोचन गरिएको छ ।
निबन्ध संग्रहको आज एक कार्यक्रमका बीच पूर्व प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्डले विमोचन गर्नुभयो । साझा प्रकाशनमा आयोजित कार्यक्रममा पुस्तक विमोचन गर्दै अध्यक्ष प्रचण्डले राजनीति र साहित्यका दुबै विधलाई समानान्तर रुपले अघि बढाएकोमा शर्मालाई बधाई दिनुभयो । साहित्य विनाको राजनीति र राजनीति विनाको साहित्य नहुने भन्दै उहाँले दीनानाथ शर्माले आफ्ना साहित्यमा राजनीति र साहित्यको संयोजन गरेको बताउनुभयो ।

प्रचण्डले आफुमा कविता, कथा र उपन्यास पढ्दा बोलेर पढ्न भावुकता रहेको बताउनुभयो । राजनीतिक कर्मको बाध्यात्मक अवस्थाका कारण रुची हुँदाहुँदै साहित्य विधामा अघि बढ्न नसकेको स्मरण गर्दै उहाँले भन्नुभयो, ‘साहित्यतिर प्रयास गर्दै थिएँ, सक्रिय राजनीतिले थिच्यो, अघि बढ्न पाइन ।’ उहाँले थप्नुभयो, – आफु साहित्यिक फाँटमा अघि बढ्न नसके पनि सहयोद्धा कमरेड शर्मा अरु राजनीतिज्ञहरुका लागि समेत उदाहरण बन्न सक्नुहुन्छ ।

विमोचन कार्यक्रममा शताब्दी पुरुष सत्यमोहन जोशीले नेपाली भाषाको विकासक्रममा साहित्यकार दीनानाथ शर्माबाट नौलो गद्य शैली स्थापित भएको बताउनुभयो । जोशीले शर्माका साहित्यमा नेपालको लोक जीवनपद्दती र गाउँले जीवनदर्शन झल्किने बताउनुभयो ।
यस्तै, निबन्धमाथि प्रकाश पार्दै समालोचक प्राध्यापक डाक्टर उषा ठाकुरले शर्माको व्यक्तित्वमा राजनीति र साहित्यको सुन्दर सम्बन्ध स्थापित भएको बताउनुभयो । ठाकुरले भन्नुभयो, ‘राजनीतिक व्यक्तित्व जति सवल छ, साहित्यिक व्यक्तित्व पनि उक्तिकै सशक्त रहेका शर्माका कृतिमा जीवन र जगतसम्बन्धी समय सान्दर्भिक चिन्तन अभिव्यक्ति पाइन्छ ।’

प्राध्यापक डाक्टर बासुदेव त्रिपाठीले शर्माका निबन्धमा देश र समाजको जीवन्त प्रतिनिधित्व बोकेका रचना समावेश भएको बताउनुभयो ।
नेपाल प्रज्ञा प्रतिष्ठानका कुलपति गंगाप्रसाद उप्रेतीले यस वर्ष साहित्कि मूल्य मान्यता बोकेका सन्दर कृति नेपाली बाङ्मयले प्राप्त गरेको भन्दै भविष्यमा पनि थप समृद्ध रचनाहरु ल्याउन शुभकामना दिनुभयो ।