काठमाडौं २३ मंसिर । अमेरिकी सहायक विदेशमन्त्री डोनाल्ड लुले कांग्रेस सभापति शेरबहादुर देउवा र माओवादी केन्द्र अध्यक्ष पुष्पकमल दाहाल प्रचण्डलाई भेट्दैछन् ।

भारत, श्रीलंका र नेपाल भ्रमण क्रममा आज काठमाडौं आइपुगेका लुले प्रधानमन्त्री केपी शर्मा ओलीलाई भेट्ने कार्यक्रम भने तय छैन ।

राजनीतिक स्रोतका अनुसार आइतबार दिउँसो लुले कांग्रेस सभापति शेरबहादुर देउवा र माओवादी केन्द्र अध्यक्ष प्रचण्ड दुवैलाई भेट्ने भएका हुन् ।

प्रधानमन्त्री ओली भने यही बेला गृहजिल्ला झापा उडेकाले लुसँग उनको भेट हुने छैन । ‘प्रधानमन्त्री उपत्यकाबाहिर हुनुुहुन्छ,’ बालुवाटार स्रोतले भन्यो, ‘यसअघि नै तय भएका कार्यक्रमहरुको सिलसिलामा उहाँ बाहिर हुनुहुन्छ ।’

यसअघि एमसिसीको अनुमोदन तथा स्टेट पार्टनरसिप प्रोग्रामलाई जोड दिन लु काठमाडौं आएका बेला नेपाली नेतृत्वसँग चर्काचर्की परेको सूचना सार्वजनिक भएको थियो ।

प्रधानमन्त्री ओली गृहजिल्ला पुग्नुलाई कतिपयले संयोगमात्रै नभई त्यही तिक्ततालाई दिइएको कुटनीतिक प्रतिक्रिया मानेका छन् ।

अमेरिकी दूतावास स्रोतका अनुसार नागरिक समाज र युवा अन्तक्र्रिया बाहेक उच्चस्तरीय भेट राखिएको छैन । दूतावासले लुको भ्रमण सूची सार्वजनिक गरेको छ, जहाँ प्रधानमन्त्रीलगायत नेताहरुको भेट कार्यक्रम सार्वजनिक छैन ।

स्मरण रहोस्, लुभन्दा तल्लो श्रेणीका राजनीतिकर्मी अनि सरकारी अधिकारी नेपाल आउँदा पनि सामान्यतयाः प्रधानमन्त्रीलाई भेटिरहेका हुन्छन् । उच्च स्रोतका अनुसार लु र प्रधानमन्त्रीबीच भेट हुने सम्भावना निकै कम छ ।

राष्ट्रपति रामचन्द्र पौडेल अस्वस्थ रहेकाले लुले भेट्ने छैनन् । परराष्ट्रमन्त्री आरजु राणा देउवा पनि यति बेला नेपाल बाहिर छिन् ।

दक्षिण तथा मध्य एसिया हेर्ने मन्त्री लु यसअघि पटक पटक नेपाल आइसकेका उच्च अमेरिकी अधिकारी हुन् ।