काठमाडौं । नेपाली कांग्रेसको संस्थापन इतर समूहको राष्ट्रिय सम्मेलनको समापन समारोहमा नेताहरूबीच लफडा भएको छ ।

आइतबार दिउँसो सम्मेलनका निर्णय सुनाउने क्रममा नेता विमलेन्द्र निधिले कार्यक्रम सञ्चालकलाई रोकेर आफूले निर्णय सुनाउन खोजेपछि विवाद उत्पन्न भएको हो ।

कार्यक्रम सञ्चालकले निर्णय सुनाइरहेका बेला निधिले उनलाई ‘हट्नुहोस्’ भनेपछि नेता प्रकाशशरण महतले निधिलाई धकेलेको दृश्य देखिएको छ । त्यसपछि निधि फेरि पोडियममा फर्किएर कार्यक्रम सञ्चालकसँग विवाद गरेका थिए ।

निधि र सञ्चालकबीच विवाद भएपछि महत र नेता शंकर भण्डारी पनि पोडियममा पुगेका थिए । उनीहरूबीच केहीबेर भनाभन भएको देखिएको छ ।

अन्तिममा महतले निधिलाई विवाद नगर्न आग्रह गर्दै कुर्सीमा बस्न भनेपछि स्थिति सामान्य भएको थियो ।

महाधिवेशनसम्बन्धी निर्णयमा विवाद

कार्यक्रम सञ्चालकले सुरुमा ‘१४औँ महाधिवेशनबाट निर्वाचित कार्यसमितिले १४औँ महाधिवेशन गर्ने’ भन्ने आशयको निर्णय सुनाएपछि निधिले त्यसलाई सच्याउन लगाएको बताइएको छ ।

विवादपछि कार्यक्रम सञ्चालकले निर्णय सच्याउँदै ‘१४औँ महाधिवेशनबाट निर्वाचित कार्यसमितिले १५औँ महाधिवेशन गर्ने’ उल्लेख गरेका थिए ।

यसअघि पनि सम्मेलनमा सनातन हिन्दु राष्ट्रसम्बन्धी प्रस्तावलाई लिएर नेताहरूबीच मतभेद देखिएको थियो ।

Originally published on abcnews.com.np.