काठमाडौ २८ बैशाख । बङ्गलादेशको अन्तरिम सरकारले अवामी लिगका सबै गतिविधिहरूमा प्रतिबन्ध लगाएको छ । यो प्रतिबन्धमा अवामी लिगको अनलाइन प्लेटफर्महरूमा हुने गतिविधिहरू पनि समावेश रहेका बीबीसीले जनाएको छ ।

अन्तरिम सरकारले हिजो बोलाएको सल्लाहकार परिषद्को विशेष बैठकमा पूर्वप्रधानमन्त्री शेख हसिनाको पार्टी अवामी लिगलाई प्रतिबन्ध लगाउने निर्णय भएको हो ।

यस्तै बैठकले अन्तर्राष्ट्रिय फौजदारी न्यायाधिकरण ऐनमा संशोधन पनि अनुमोदन गरेको छ । संशोधन अनुसार अन्तर्राष्ट्रिय फौजदारी न्यायाधिकरणले कुनै पनि राजनीतिक दल, उसका सहयोगी वा समर्थक समूहहरूलाई सजाय दिन सक्नेछ । यो निर्णय बङ्गलादेश अवामी लिग र उसका नेताहरूविरुद्ध अन्तर्राष्ट्रिय फौजदारी न्यायाधिकरण ऐन अन्तर्गत मुद्दा पूरा नभएसम्म लागू रहने खबरमा उल्लेख छ ।

बङ्गलादेशमा पछिल्ला केही दिनदेखि विरोध प्रदर्शनहरू भइरहेका थिए । राष्ट्रिय नागरिक पार्टी ९एनसीपी० लगायत धेरै दल र सङ्गठनहरूले विगत दुई दिनदेखि अवामी लिगलाई ‘आतङ्कवादी सङ्गठन’ का रूपमा प्रतिबन्ध लगाउन माग गरिरहेका छन् ।

गएको वर्षको अगस्ट महिनामा भएको आन्दोलनका कारण बङ्गलादेशमा अवामी लिगको १५ वर्ष पुरानो शासन समाप्त भएको थियो । यसपछि धेरै राजनीतिक दलहरूले अवामी लिगमाथि प्रतिबन्ध लगाउन माग गरिरहेका थिए ।

नोबेल पुरस्कार विजेता मोहम्मद युनुसको नेतृत्वमा रहेको अन्तरिम सरकारले बङ्गलादेश अवामी लिगको विद्यार्थी सङ्गठन बङ्गलादेश छात्र लिगमाथि यसअघि नै प्रतिबन्ध लगाएको छ ।