काठमाडौं २ जेठ । अमेरिकी राष्ट्रपति डोनाल्ड ट्रम्पले शुक्रबार संयुक्त अरब इमिरेट्सको राजधानी अबु धाबीमा व्यापारिक नेताहरूसँग भेटघाट गरेपछि आफ्नो कार्यकालको पहिलो औपचारिक त्रिदेशीय भ्रमण सम्पन्न गरेका छन् । शुक्रबार उनको चारदिने मध्यपूर्व भ्रमणको अन्तिम दिन थियो। यो भ्रमण भव्य स्वागत, शानदार समारोह र धनी खाडी मुलुकहरूसँग भएका व्यापारिक सम्झौताहरूको घोषणाले विश्व चर्चित बनेको छ ।

अमेरिकी मिडिया विवरणहरु अनुसार ट्रम्पले अबु धाबीमा एक अन्तरधर्म केन्द्रको भ्रमण गरे र त्यसपछि संयुक्त राज्य अमेरिकातर्फ फर्कन एयर फोर्स वनमा चढे। यस हप्ताको सुरुमा, उनले आफ्नो दोस्रो कार्यकालको पहिलो प्रमुख अन्तर्राष्ट्रिय भ्रमणको क्रममा साउदी अरेबिया र कतारको भ्रमण गरेका थिए।

ट्रम्पको भ्रमणका केही प्रमुख उपलब्धिहरू

सिरियासँगको पुनः सम्वन्धः बुधबार ट्रम्पले सिरियाका नयाँ राष्ट्रपति अहमद अल–शारा सँग साउद अरबको रियादमा त्यहाँका शासक राजकुमारको मध्यस्थतामा असाधारण भेटवार्ता गरे । यसले संयुक्त राज्यको सिरिया र शारा,(एक पूर्व लडाकू र अल–कायदाको शाखाका पूर्व नेता थिए) प्रति लामो समयदेखिको नीतिलाई उल्टायो। एक दिनअघि, ट्रम्पले सिरियामाथिको अमेरिकी प्रतिबन्ध हटाउने घोषणा गरे लगत्तै अन्तरिम स्वघोषित राष्ट्रपति अल शारासँग भेटवार्ता गरेका हुन् । यस विकासक्रमले वर्षौंदेखिको गृहयुद्धले ध्वस्त भएको देश सिरियालाई महत्त्वपूर्ण आर्थिक जीवनरेखा प्रदान गर्ने विश्लेषण गरिएको छ ।

सम्झौताहरूः ह्वाइट हाउसले ट्रम्पको भ्रमणले अमेरिकी कम्पनीहरूका लागि सयौं अर्ब डलर मूल्यका सम्झौताहरू भएको बताएको छ, जसमा कतारबाट बोइङको यात्रु विमानका लागि ठूलो अर्डर पनि समावेश छ। तर, अमेरिका मिडियाहरुका अनुसार त्यसखाले सम्झौताको विस्तृत विवरणहरू कम रहेको टिप्पणी गरेका छन् ।

इरानसँग वार्ताः ट्रम्पले इरानसँगको आणविक वार्तामा प्रगति भएको संकेत गरेका छन् । संयुक्त राज्यले तेहरानलाई आणविक हतियार विकास गर्न नदिने अडान राख्दै, उनले आफ्नो प्रशासन ‘इरानसँग दीर्घकालीन शान्तिका लागि गम्भीर वार्तामा’ रहेको बताए।

गाजा द्वन्द्वः ट्रम्पले अमेरिकाको सबैभन्दा ठूलो क्षेत्रीय सहयोगी इजरायलको भ्रमण गरेनन् र गाजामा चलिरहेको द्वन्द्वलाई पनि धेरै हदसम्म बेवास्ता गरे । तर इजरायली हमलाहरूले त्यहाँ दर्जनौं प्यालेस्टाइनीहरूको ज्यान लिएको प्रति भने दुख व्यक्त गरे । शुक्रबार, उनले यो द्वन्द्व समाधान भएको देख्न चाहेको बताए र त्यहाँको नागरिक कष्टलाई दुर्लभ रूपमा स्वीकार गरे। ‘त्यहाँ धेरै मानिसहरू भोकमरीमा छन्, धेरै नराम्रा कुराहरू भइरहेका छन्,’ उनले भने।

युक्रेन वार्ताः ट्रम्पले रुस र युक्रेन समावेश युद्धविराम वार्तालाई समर्थन गर्न टर्की जाने कि नजाने भन्नेमा मानिसहरूलाई अनुमानमा राखे, तर अन्ततः नजाने निर्णय गरे। रुसी र युक्रेनी अधिकारीहरू इस्तानबुलमा वार्ताका लागि खटिइरहेका छन्, ट्रम्प प्रशासनका शीर्ष अधिकारीहरूसँगै । तर रुसका राष्ट्रपति भ्लादिमिर पुटिन उपस्थित छैनन् ।