काठमाडौं २२ असार । इजिप्टका राष्ट्रपति अब्देल–फत्ताह अल–सिसीले राजधानी कायरोको पूर्वमा अवस्थित नयाँ प्रशासनिक राजधानीमा अक्टागन भनिने राज्य रणनीतिक कमान्ड मुख्यालयको उद्घाटन गर्नुभएको छ । राष्ट्रपति कार्यालयद्वारा जारी विज्ञप्तिअनुसार सो मुख्यालयले देशको सैन्य तथा रणनीतिक सञ्चालन प्रणालीमा नयाँ आयाम थप्नेछ । उद्घाटन समारोहलाई सम्बोधन गर्दै राष्ट्रपति सिसीले नयाँ कमाण्ड मुख्यालयलाई एक गौरवशाली राष्ट्रिय संरचनाको रूपमा वर्णन गर्नुभयो । उहाँले यो परिसर इजिप्टको कमाण्ड, नियन्त्रण र अपरेशन व्यवस्थापन प्रणालीमा एउटा महत्वपूर्ण फड्को भएको बताउनुभयो । 
अत्याधुनिक प्राविधिक पूर्वाधार, सुरक्षित सञ्चार प्रणाली र सूचना संकलन एवं विश्लेषणको उन्नत क्षमताले सुसज्जित यो मुख्यालय सैन्य मामिला व्यवस्थापनका लागि मात्र नभई राज्यका चुनौती र असाधारण परिस्थितिहरूको सामना गर्न सक्षम आधारस्तम्भको रूपमा डिजाइन गरिएको मिश्रका राष्ट्रपतिले उल्लेख गर्नुभयो ।
मिश्रको सरकारी समाचार एजेन्सी मेनाकाअनुसार राष्ट्रपति सिसीले आधिकारिक उद्घाटन बडापत्रमा हस्ताक्षर गर्नुका साथै सो परिसरमा सशस्त्र बलको झण्डा झण्डोत्तोलन गर्नुभएको थियो ।
अक्टागन मध्यपूर्व क्षेत्रकै सबैभन्दा ठूलो कमाण्ड सेन्टर हो । यसले उन्नत सञ्चार प्रविधि र आर्टिफिसियल इन्टेलिजेन्स (एआई) मार्फत राज्यका सार्वभौम निकायहरूलाई आपसमा जोड्ने र एकीकृत संकट व्यवस्थापन केन्द्रको रूपमा काम गर्ने समाचारमा जनाइएको छ ।