काठमाडौं, ३ साउन । भारतको पश्चिम बंगाल राज्यको मुर्शिदाबाद जिल्लामा एउटा यात्रुवाहक रेलले विद्यालयको भ्यान र साइकलयात्रीलाई ठक्कर दिँदा तीन बालबालिकासहित चार जनाको मृत्यु भएको छ।

उक्त दुर्घटनामा अन्य पाँच जना घाइते भएका छन्। प्रहरीकाअनुसार पश्चिम बंगालको राजधानी कोलकाताबाट करिव २१५ किलोमिटर उत्तरमा पर्ने कर्णसुवर्ण स्टेसन नजिकैको गोविन्दपुर रेलवे गेटमा सो दुर्घटना भएको हो। एउटा एक्सप्रेस रेल पार भएलगत्तै रेलवे क्रसिङको गेट खोलिएको भएपनि सोही समयमा अर्को यात्रुवाहक रेल आउने तालिका रहेको थियो।

गेट समयभन्दा अगाडि नै खोलिएका कारण दुर्घटना भएको प्रहरीको प्रारम्भिक अनुमान छ। क्रसिङ खुला देखेपछि विद्यार्थी बोकेको भ्यान र एक साइकलयात्रीले ट्रयाक पार गर्न खोज्दा तीव्र गतिमा आएको स्थानीय रेलले उनीहरूलाई ठक्कर दिएको थियो। कर्तव्यमा लापरवाही गरेको आरोपमा रेलवे क्रसिङका गेटम्यानलाई प्रहरीले नियन्त्रणमा लिएको छ।

साथै, दुर्घटनाको गम्भीरतालाई ध्यानमा राख्दै घटनाको विस्तृत अनुसन्धानका लागि १० सदस्यीय उच्चस्तरीय रेलवे टोली गठन गरिएको छ।