काठमाडौं, ३ साउन । अमेरिकी राष्ट्रपति डोनाल्ड ट्रम्प आइतबार मध्य राति हुने फिफा विश्वकप फुटबलको फाइनल खेलमा विशेष उपस्थितिका रूपमा सहभागी हुनुहुने भएको छ।

उहाँले स्पेन र अर्जेन्टिनाबीच हुने उपाधि भिडन्तपछि फिफाका अध्यक्ष जियानी इन्फान्टिनोसँग मिलेर विजेता टोलीलाई ट्रफी प्रदान गर्ने कार्यक्रम रहेको हो । राष्ट्रपति ट्रम्पले न्यु जर्सीमा हुने उक्त फाइनल खेलको प्रत्यक्ष अवलोकन गर्ने पहिलो विश्वकप खेल हुनेछ । यद्यपि, प्रतियोगिताका क्रममा उहाँको भूमिकाले यसअघि नै विवाद समेत निम्त्याएको छ ।

अन्तिम १६ चरणअघि अमेरिकी स्ट्राइकर फोलारिन बालोगुनमाथिको रातो कार्ड फिर्ता लिन वा निलम्बन गर्न आग्रह गर्दै राष्ट्रपति ट्रम्पले फिफा अध्यक्ष इन्फान्टिनोलाई फोन गरेको समाचार सार्वजनिक भएको थियो । राष्ट्रपति ट्रम्पले यो विश्वकपलाई अहिलेसम्मकै सबै भन्दा सफल प्रतियोगिता भएको दावी गर्दै आउनुभएको छ । प्रतियोगिताले अमेरिकामा फुटबलप्रतिको आकर्षण र लोकप्रियता बढाएको उहाँको भनाइ थियो।

राष्ट्रपति ट्रम्पसँगै प्रथम महिला मेलानिया ट्रम्प, उहाँका छोरा ब्यारन ट्रम्प तथा मेलानियाका पिता भिक्टर नाभ्स पनि फाइनलमा उपस्थित हुने जनाइएको छ । त्यस्तै, स्पेनका प्रधानमन्त्री पेड्रो सान्चेज तथा स्पेनी राजपरिवारका सदस्यहरू समेत फाइनल हेर्न पुग्ने भएका हुन् ।