काठमाडौं — नेपाल आयल निगमले साउन १८ गतेदेखि लागू हुने गरी हवाई इन्धनको मूल्य प्रतिलिटर २० रुपैयाँले बढाएपछि आन्तरिक वायुसेवा कम्पनीहरूले पनि इन्धन शुल्क समायोजन गर्दै हवाई भाडा बढाएका छन्।

हवाई टिकटमा समावेश हुने इन्धन शुल्क आयल निगमले निर्धारण गरेको इन्धन मूल्यका आधारमा समायोजन हुने भएकाले सोमबारदेखि यात्रुले बढेको शुल्कसहितको भाडा तिर्नुपर्ने भएको हो।

यसअघि असार १६ गते हवाई इन्धनको मूल्य प्रतिलिटर ४० रुपैयाँले घटाइएपछि वायुसेवा कम्पनीहरूले पनि इन्धन शुल्क घटाएका थिए। तर, साउन १८ गतेदेखि इन्धनको मूल्य पुनः बढेपछि भाडा पनि बढाइएको हो।

सबैभन्दा बढी वृद्धि काठमाडौं–धनगढी रुटमा भएको छ। यस रुटमा इन्धन शुल्क ८७९ रुपैयाँ ५५ पैसा बढेको छ। यता, सबैभन्दा कम वृद्धि काठमाडौं–सिमरा रुटमा भएको छ, जहाँ १८३ रुपैयाँ ५ पैसा थपिएको छ।

अन्य प्रमुख गन्तव्यमा काठमाडौं–सुर्खेतमा ६८९ रुपैयाँ ९५ पैसा, काठमाडौं–माउन्टेन उडानमा ६८८ रुपैयाँ ४५ पैसा, काठमाडौं–नेपालगञ्जमा ६५४ रुपैयाँ ५ पैसा, काठमाडौं–भद्रपुरमा ५९९ रुपैयाँ ९५ पैसा, काठमाडौं–विराटनगरमा ४७७ रुपैयाँ ७० पैसा, काठमाडौं–भैरहवामा ४०९ रुपैयाँ ५५ पैसा, काठमाडौं–राजविराजमा ४०५ रुपैयाँ ६५ पैसा, काठमाडौं–तुम्लिङटारमा ३६८ रुपैयाँ ४५ पैसा, काठमाडौं–पोखरामा ३१४ रुपैयाँ ३५ पैसा, काठमाडौं–जनकपुरमा २५८ रुपैयाँ ५५ पैसा र काठमाडौं–भरतपुरमा २११ रुपैयाँ ८० पैसा इन्धन शुल्क बढेको छ।

त्यसैगरी पोखराबाट सञ्चालन हुने उडानहरूमा पनि भाडा समायोजन गरिएको छ। पोखरा–नेपालगञ्ज रुटमा ४७४ रुपैयाँ २५ पैसा, पोखरा–भैरहवामा २५९ रुपैयाँ २० पैसा र पोखरा–भरतपुरमा २१७ रुपैयाँ ८५ पैसा इन्धन शुल्क थपिएको छ।

हवाई सेवा कम्पनीहरूका अनुसार इन्धन मूल्यमा हुने उतारचढावअनुसार इन्धन शुल्क नियमित रूपमा समायोजन गरिने भएकाले आगामी दिनमा निगमले मूल्य परिवर्तन गरेसँगै हवाई भाडामा पनि फेरबदल हुनेछ।

Originally published on abcnews.com.np.