काठमाडौं । आईएमई खल्ती लिमिटेड (खल्ती) ले अर्थ मन्त्रालयअन्तर्गतको आन्तरिक राजस्व विभागले सञ्चालन गरेको ‘करदाता प्रोत्साहन उपहार कार्यक्रम, २०८३’ मा आफ्ना प्रयोगकर्तालाई स्वतः सहभागी हुने व्यवस्था गरेको छ।

खल्तीका अनुसार अब रु. १०० वा सोभन्दा बढीको योग्य डिजिटल भुक्तानी गर्ने प्रयोगकर्ता दैनिक तथा पाक्षिक उपहार योजनामा स्वतः सहभागी हुनेछन्।

कार्यक्रमअन्तर्गत हरेक दिन एक जना विजेताले कर कट्टीपछि १ लाख रुपैयाँ प्राप्त गर्नेछन् भने हरेक १५ दिनमा एक जना बम्पर विजेताले १० लाख रुपैयाँ जित्ने अवसर पाउनेछन्।

खल्तीले जनाएको अनुसार योग्य डिजिटल कारोबारको विवरण सुरक्षित प्रणालीमार्फत स्वतः आन्तरिक राजस्व विभागको प्लेटफर्ममा पठाइनेछ। त्यसका आधारमा उपहार कुपन स्वतः सिर्जना हुनेछ, जसलाई प्रयोगकर्ताले आफ्नै खल्ती एपमार्फत हेर्न सक्नेछन्।

आन्तरिक राजस्व विभागले प्रत्येक महिनाको १ र १६ गते स्वचालित प्रणालीमार्फत विजेता छनोट गरी मोबाइल फोन र इमेलमार्फत जानकारी गराउनेछ। खल्तीमार्फत सहभागी भएर विजेता बनेका प्रयोगकर्तालाई कम्पनीले पनि आफ्ना विभिन्न सञ्चार माध्यमबाट सूचना उपलब्ध गराउने जनाएको छ।

खल्तीका अनुसार यो पहलले बिलमा आधारित कारोबारलाई प्रोत्साहन, डिजिटल भुक्तानीप्रति उपभोक्ताको विश्वास अभिवृद्धि तथा कारोबारको अभिलेखीकरणलाई थप प्रभावकारी बनाउने अपेक्षा गरिएको छ। यसबाट औपचारिक अर्थतन्त्रको विस्तार र राष्ट्रिय राजस्व प्रणाली सुदृढीकरणमा समेत सहयोग पुग्ने कम्पनीको विश्वास छ।

आईएमई खल्ती लिमिटेडका प्रमुख कार्यकारी अधिकृत प्रवीण रेग्मीले सरकारको डिजिटल कर प्रणालीलाई जनस्तरसम्म पुर्‍याउन सहकार्य गर्न पाउँदा उत्साहित रहेको बताए।

“सरकारको यस महत्त्वपूर्ण पहललाई खल्तीका प्रयोगकर्तासम्म सहज रूपमा पुर्‍याउन पाउँदा हामी उत्साहित छौँ। सरकारी प्राथमिकतासँग सहकार्य गर्नु, वित्तीय पारदर्शिता प्रवर्द्धन गर्नु र डिजिटल अर्थतन्त्र निर्माणको राष्ट्रिय अभियानमा जिम्मेवार योगदान दिनु हाम्रो प्रतिबद्धता हो। सुरक्षित, सहज र समावेशी डिजिटल वित्तीय सेवामार्फत प्रत्येक नेपालीलाई औपचारिक अर्थतन्त्रसँग जोड्ने हाम्रो प्रयास निरन्तर रहनेछ,” उनले भने।

Originally published on abcnews.com.np.