काठमाडौं । नेपाली कांग्रेसका सांसद डा. चन्द्रमोहन यादवले धनुषाको ढल्केवरमा प्रस्तावित ट्रमा सेन्टरको योजना अलपत्र परेको भन्दै सरकारको ध्यानाकर्षण गराएका छन्।

शुक्रबार प्रतिनिधिसभाको बैठकमा बोल्दै सांसद यादवले स्वास्थ्य तथा खाद्य स्वच्छतामन्त्री निशा मेहताले मधेश प्रदेशको लहानमा ट्रमा सेन्टर निर्माण हुने जानकारी दिएको उल्लेख गर्दै ढल्केवरमा यसअघि घोषणा गरिएको ट्रमा सेन्टरको योजना किन अघि नबढाइएको भन्ने प्रश्न उठाए।

उनले अन्य स्थानमा ट्रमा सेन्टर निर्माण गरिनुमा कुनै आपत्ति नरहेको स्पष्ट पार्दै ढल्केवरका लागि स्वीकृत योजना भने कुनै हालतमा कार्यान्वयन हुनुपर्ने बताए।

“अन्यत्र ट्रमा सेन्टर बन्दा हामीलाई कुनै आपत्ति छैन। तर ढल्केवरमा जुन डेडिकेटेड ट्रमा सेन्टर थियो, त्यो कहाँ हरायो ? सरकारसँग मेरो प्रश्न छ,” सांसद यादवले भने।

सांसद यादवका अनुसार संघीय सरकारले आर्थिक वर्ष २०७८/७९ को बजेटमार्फत धनुषाको हालको मिथिला नगरपालिका–७ स्थित ऐलानी जग्गामा ट्रमा सेन्टर निर्माणका लागि पहिलो पटक बजेट विनियोजन गरेको थियो।

त्यसयता हरेक आर्थिक वर्ष सोही आयोजनाका लागि बजेट छुट्याइए पनि निर्माण प्रक्रिया भने अघि बढ्न नसकेको उनले बताए।

उनले पूर्व–पश्चिम राजमार्ग र कोशी राजमार्गको संगमस्थलमा रहेको ढल्केवर उच्च सवारी चाप भएको रणनीतिक क्षेत्र भएकाले यहाँ ट्रमा सेन्टरको आवश्यकता अझ बढी रहेको उल्लेख गरे।

स्वास्थ्य तथा खाद्य स्वच्छतामन्त्री निशा मेहताले लहानमा ट्रमा सेन्टर निर्माण हुने जानकारी दिएपछि ढल्केवरमा प्रस्तावित ट्रमा सेन्टरको भविष्यबारे पुनः बहस सुरु भएको छ।

सांसद यादवले सरकारले पूर्वनिर्णय कार्यान्वयन गर्दै ढल्केवरमा प्रस्तावित ट्रमा सेन्टर निर्माण प्रक्रिया तत्काल अघि बढाउन माग गरेका छन्।

Originally published on abcnews.com.np.