बागलुङ । बागलुङ प्रहरीले अवैध रूपमा उत्खनन गरी स्लेट ढुंगा ओसारपसार गरिरहेको एक पिकअप भ्यान नियन्त्रणमा लिएको छ। आवश्यक कागजात तथा बिलबिजकविना ढुंगा ढुवानी गरिएको पाइएपछि सम्बन्धित सवारीलाई कारबाही गरिएको हो।

जिल्ला प्रहरी कार्यालय बागलुङका अनुसार प्रहरी चौकी बिहुँबाट खटिएको टोलीले नियमित चेकजाँचका क्रममा ताराखोला गाउँपालिका–१ माझखर्कबाट पोखरातर्फ जाँदै गरेको बा १३ च ५०१३ नम्बरको पिकअप भ्यान नियन्त्रणमा लिएको थियो।

प्रहरीको प्रारम्भिक जाँचमा उक्त पिकअपमा अवैध रूपमा उत्खनन गरिएको ठूलो परिमाणको स्लेट ढुंगा ओसारपसार भइरहेको भेटिएपछि सवारी साधनलाई आवश्यक कारबाहीका लागि बागलुङ नगरपालिकामा बुझाइएको जिल्ला प्रहरी कार्यालय बागलुङका सूचना अधिकारी प्रहरी नायब उपरीक्षक रामेश्वर त्वाती ले जानकारी दिए।

नगरपालिकाको राजस्व शाखाले गरेको परीक्षणमा ढुंगा ढुवानीका लागि आवश्यक भ्याट बिल तथा बिलबिजक नभएको पुष्टि भएपछि सवारीधनीलाई १० हजार रुपैयाँ जरिवाना गरिएको छ।

बागलुङ नगरपालिकाका राजस्व शाखाका सहायक कम्प्युटर अपरेटर हरिनारायण उपाध्याय का अनुसार वैधानिक कागजातबिना ढुंगाको कारोबार तथा ढुवानी गरिएको पाइएकाले प्रचलित कानुनअनुसार जरिवाना गरिएको हो।

“भ्याट बिलबिना अवैध रूपमा कारोबार गरेको देखिएपछि कारबाहीस्वरूप १० हजार रुपैयाँ जरिवाना गरिएको हो,” उपाध्यायले बताए।

पछिल्लो समय बागलुङका विभिन्न क्षेत्रमा नदीजन्य तथा खानीजन्य सामग्रीको अवैध उत्खनन र ओसारपसारका घटना बढ्दै गएको भन्दै प्रहरीले नियमित निगरानी र चेकजाँचलाई थप कडा बनाएको जनाएको छ। प्रहरी र स्थानीय तहले प्राकृतिक स्रोत–साधनको अवैध दोहन रोक्न संयुक्त रूपमा अनुगमनलाई निरन्तरता दिने बताएका छन्।

Originally published on abcnews.com.np.