काठमाडौं । राष्ट्रिय स्वतन्त्र पार्टी (रास्वपा) की सांसद लिमा अधिकारीले नागरिक खाली ग्यास सिलिन्डर बोकेर मध्यरातसम्म लाइनमा बस्न बाध्य भएको भन्दै सरकारको आलोचना गरेकी छन्।

सोमबार प्रतिनिधिसभाको बैठकमा बोल्दै अधिकारीले ग्यासका लागि नागरिकले कहिलेसम्म सास्ती भोग्नुपर्ने हो भन्दै सरकारलाई प्रश्न गरिन्।

‘भान्सामा साँझ–बिहान छाक टार्न धौधौ परेका सर्वसाधारण नागरिक खाली ग्यास सिलिन्डर बोकेर मध्यरातसम्म लाइनमा बस्न बाध्य छन्। आखिर नागरिकले यस्तो सास्ती कहिलेसम्म भोगिरहनुपर्ने हो सरकार?’ उनले प्रश्न गरिन्।

देशमा उत्पादित बिजुली खेर गइरहेको अवस्थामा ग्यासका लागि नागरिकलाई मध्यरातसम्म लाइनमा उभ्याउनु ठूलो विडम्बना भएको उनको भनाइ थियो।

अधिकारीले ग्यासको अभावबाट नागरिकलाई राहत दिन सरकारले तत्काल इन्डक्सन चुलो वितरण गर्ने व्यवस्था गर्नुपर्ने बताइन्।

ग्यास आपूर्तिमा पटकपटक समस्या भइरहँदा विद्युत् खपतमा लगाइएका नीतिले वैकल्पिक इन्धनको प्रयोगलाई निरुत्साहित गरेको हो कि होइन भन्ने विषयमा सरकारले गम्भीर भएर समीक्षा गर्नुपर्ने उनले बताइन्।

विद्युतीय चुलोको प्रयोगलाई सहज र सुलभ बनाउनसमेत उनले सरकारको ध्यानाकर्षण गराइन्।

Originally published on abcnews.com.np.